Toleránsia pontu iha loron 3 fulan-novembru
Prezidénsia Konsellu Ministrus
VI Governu Konstitusionál
..............................................................................................................................
Dili, loron 28 fulan-outubru tinan 2016
Komunikadu Imprensa
Toleránsia pontu iha loron 3 fulan-novembru
Governu deside ona hodi fó toleránsia pontu iha loron 3 fulan-novembru tinan 2016 ba funsionáriu no ajente sira hotu husi ministériu sira ka servisu hirak ne’ebé depende ba sira, nune’e mós institutu no organizmu hirak ne’ebé integra ba-iha administrasaun indireta Estadu nian.
Desizaun ida ne’e bazeia ba Lei n.10/2005, loron 10 fulan-agostu, ne’ebé determina feriadu nasionál sira, data ofisiál komemorasaun nian sira no regra sira kona-ba toleránsia pontu. Entre data ofisiál komemorasaun nian sira maka loron 1 fulan-novembru, Loron Santu sira nian no, loron 2 fulan-novembru, Loron Matebian sira nian. Loron-boot rua ne’e iha signifikadu boot ba sarani sira, ne’ebé halo tuir tradisaun katólika europeia nian ne’ebé hahú kedas husi sékulu II, vizita martir no matebian sira-nia rate.
Haree katak ema barak maka sempre dezloka ba Munisípiu sira atu partisipa iha loron boot hirak ne’e, Governu deside fó toleránsia pontu durante loron tomak iha loron 3 fulan-novembru, atu nune’e sira ne’ebé dezloka ba distritu bele fila mai sira-nia hela-fatin ho hakmatek. REMATA
