Governu hatuur Timor-Leste hanesan fatin turístiku úniku no akolledór no lansa Portál foun Turizmu nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 27 fulan-outubru tinan 2016
Governu hatuur Timor-Leste hanesan fatin turístiku úniku no akolledór no
lansa Portál foun Turizmu nian
Governu hatuur Timor-Leste hanesan fatin turístiku úniku no akolledór no lansa Portál foun Turizmu nian Iha loron 26 fulan-outubru kalan, Governu ofisialmente lansa ona Portál foun Turizmu nian, iha http://www.timorleste.tl.
Portál ne’e hanesan pájina dijitál ida ne’ebé hakarak halibur informasaun fiar-bele (kredivel) sira no atualizada kona-ba buat hotu ne’ebé Timor-Leste iha atuoferese hanesan fatin turístiku úniku no akolledór. Ministru Turizmu, Artes no Kultura, Francisco Kalbuady Lay, hateten katak portál ida ne’ebé iha kualidade aas sei foti aas perfil Timor-Leste nian iha nivel internasional, hodi hamosu interese no tulun ema hodi konverte ninia “vizaun iha vizita ida” no halo planu kona-ba nia viajen.
Portál ne’e hanesan kolaborasaun ida entre Ministériu Turizmu, Artes no Kultura no Asia Foundation. Faze dezenvolvimentu portál ne’e nian han tempu fulan neen no inklui prosesu rigorozu ida kona-ba halibur informasaun nian, sesaun fotografia nian sira iha nivel nasionál no konsulta barak ho parte sira ne’ebé iha interese iha setór Turizmu no parseiru dezenvolvimentu nian sira. Portál ne’e sei hetan atualizasaun nafatun no fó biban ba ema sira atubele hato’o sujestaun, fó informasaun no hato’o kestaun ruma. Projetu ida ne’e hetan finasiamentu husi Ministériu Turizmu, Artes no Kultura, Asia Foundation, Organizasaun Internasionál Traballu, Embaixada Austrália no Embaixada Nova Zelándia.
Kriasaun portál ne’e nian hanesan etapa ida de’it husi kampaña marketing internasionál ne’ebé maka Governu prepara hela, ho apoiu husi parseiru sira, no sai hanesan ninia merkadu alvu mak Austrália, Indonézia no Portugál, no seluk-seluk tan. Konseitu ida ne’ebé ho marka, logótipu ida no slogan ida sei aprezenta ba-iha Konsellu Ministrus iha tempu badak nia laran atubele hetan apresiasaun.
Aprezentasaun ne’e halo hafoin enserramentu Konferénsia Internasionál kona-ba Turizmu ne’ebé hala’o semana ne’e iha Dili, iha ne’ebé Ministru Estadu, Koordenadór Asuntu Ekonómiku no Ministru Agrikultura no Peskas, Estanislau da Silva, hateten katak Turizmu “importante tebes ba futuru ekonomia Timor-Leste nian no ba kualidade moris nian ne’ebé ita hakarak garante ba sidadaun hotu-hotu iha país ne’e no husik hela ba jerasaun sira aban bainrua nian.
Portavós Governu nian, Ministru Estadu Agio Pereira, felisita ema hotu ne’ebé envolve iha dezenvolvimentu portál nian no dehan: “Turizmu hanesan ai-riin ida husi ai-riin lima ba ita-nia dezenvolvimentu ekonómiku. Ita tenke halo mundu koñese saida mak ita iha atu oferese no ita prontu atu rekompensa sira ne’ebé mak mai, hodi simu sira ho di’ak no ho servisu ne’ebé iha kualidade, atu nune’e sira labele haluha sira-nia esperiénsia ne’e”. REMATA
