Programa Justisa iha Timor-Leste to’o ona nia rohan
Ministru Justisa, Ivo Valente, prezide serimónia maktakak ba Programa Justisa Uniaun Europeia nian iha Timor-Leste, ne’ebé, husikedas tinan 2012, tulun harii ona Polísia Sientífika Investigasaun Kriminál (PSIK) no Kámara Kontas, entre inisiativa sira seluk.
Objetivu jerál husi Programa ne’e maka hametin baze demokrátika husi kontrolu, fiskalizasaun no transparénsia sistema Justisa nian, hodi haree liu ba formasaun téknika kuadru sira nian, atu nune’e bele asegura funsionamentu tomak husi ninia servisu sira, iha Kámara Kontas no iha PSIK.
Iha ámbitu Kámara Kontas nian, funsionáriu na’in 30 ne’ebé integra iha Karreira Espesiál Auditór sira nian, hetan ona formasaun iha Portugal no Timor-Leste, hodi asegura akompañamentu loroloron ba sira-nia atividade.
Iha ámbitu PSIK nian ne’e, aleinde formasaun ba investigadór na’in 47 no peritu forense na’in 31, kooperasaun ne’e envolve mós iha harii Laboratóriu Polísia Sientífika nian no fornese Unidade Movel rua, ne’ebé ninia ekipamentu hotu-hotu Programa ne’e maka apoia.
Daudaun ne’e, prosesu akizisaun ekipamentu apoiu nian ba investigasaun judisiál kona-ba dokumentu sira, iha toksikolojia no balístika tama ona iha faze finál, ne’ebé sei fó ba Laboratóriu instrumentu avansadu iha área sira importante ne’e.
Durante sesaun enseramentu nian, ne’ebé hala’o iha loron 21 fulan-outubru, iha Ministériu Negósius Estranjeirus no Kooperasaun, intervensaun sira ne’ebé iha hotu-hotu rekoñese impaktu pozitivu husi Programa Justisa nian, hodi fó kontribuisaun ne’ebé desizivu ba konsolidasaun dame sosiál no demokrasia.
Loron ida molok serimónia ne’e, iha semináriu internasionál ida kona-ba atividade PSIK nian, ne’ebé hala’o iha loron 20 fulan-outubru. Iha eventu rua ne’e marka prezensa reprezentante husi Prezidente Tribunál Rekursu nian, Maria Natércia Gusmão, Xefe Delegasaun Uniaun Europeia nian iha Timor-Leste, Alexandre Leitão, Embaixadór Portugal nian iha Dili, Manuel Gonçalves de Jesus no reprezentante husi Prezidente Camões IP, Sandra Magalhães, parseiru direitu sira Programa ne’e nian, entre individualidade sira seluk.
