Ministériu Obras Públikas reabilita estrada diresaun Dili-Manatutu-Baukau
Atu populasaun sira bele iha asesu ba estrada ne’ebé maka ho kualidade di’ak, Ministériu Obras Públikas Transportes no Komunikasoins lansa simbolikamente projetu reabilitasaun estrada Dili-Manatutu-Baukau. Serimónia lansamentu ne’e hala’o iha loron 21 fulan-outubru tinan 2016, iha Munisípiu Manatutu.
Tuir Ministru Obras Públikas Transportes no Komunikasoins, Gastão de Sousa, reabilitasaun ba estrada ida ne’e hetan prioridade aas atu realiza bazeia ba rezultadu husi avaliasaun tékniku, ekonómiku no ambiental ne’ebé viavel duni. Haree husi parte ekonomia nian, retornu ne’ebé sei hetan aas duni, kurakuran 20%, bainhira estrada ne’e hadi’a ona.
Gastão de Sousa hatutan katak: “Benefísiu seluk ne’ebé mai husi ezekuasaun obra ne’e maka hanesan hamenus tempu viajen, hamenus kustu operasaun veíkulu, hasa’e rendimentu iha uma-kain sira, hadi’a di’ak liután konetividade iha rai-laran no mós hasa’e kapasidade empreza lokál sira nian atu envolve iha konstrusaun ba estrada sira iha Timor-Leste.”
Finansiamentu ba projetu reabilitasaun estrada ne’e maihusi Orsamentu Jerál Estadu nian no mós husi fundu ne’ebé Governu Timor-Leste empresta husi Governu Japaun liuhusi Japan International Cooperation Agency (JICA) [Ajénsia Japaun nian ba Kooperasaun Internasionál].
Obra reabilitasaun nian ne’e fahe ba trosu rua: ida uluk maka husi Dili ba Manatutu, hahú iha loron 30 fulan-jullu tinan 2016, iha Hera (Dili) no sei ramata iha loron 25 fulan-abríl tinan 2019, iha ponte Lakló (Manatutu) ho nia naruk maka kilómetru 48,74. Empreza ne’ebé kaer obra ne’e maka Sinohydro Corporation Limited husi Xina ho kustu totál dolar amerikanu 48.314.975,87. 
Trosu daruak maka hosi Manatutu ba Baukau, sei hahú iha loron 18 fulan-agostu tinan 2016, iha Lakló (Manatutu) no sei remata iha loron 14 fulan-maiu tinan 2019, iha Munisípiu Baukau. Trosu ida ne’e naruk maka kilómetru 57,702. Empreza ne’ebé kaer obra ne’e maka Shanghai Construction (Group) General Co., Ltd. husi xina ho kustu totál ba obra ne’e maka dolar amerika 59.287.453,55.
Embaixadór Japaun nian iha Timor-Leste, Eiji Yamamoto, - espera katak liuhosi hadi’a estrada nasionál ne’e bele kontribui, la’ós de’it ba dezenvolvimentu ekonómiku iha nivel lokál, maibé mós ba nasaun tomak.
Marka prezensa iha iha serimónia ne’e maka Ministru Planeamentu no Investimentu Estratéjiku, Kay Rala Xanana Gusmão, Ministru Negósius Estranjeirus no Kooperasaun, Hernâni Coelho, Sekretáriu Estadu Konsellu Ministrus, Avelino Maria Coelho, Sekretáriu Estadu Komunikasaun Sosiál, Nélio Isaac Sarmento, Sekretária Estadu Asuntu Parlamentár, Maria Terezinha Viegas, Membru Parlamentu sira, Administradór sira Munisípiu Dili no Manatutu nian no mós Autoridade Lokál sira seluk.
