Governu Timor-Leste

Proposta Lei Governu nian kona-ba Prevensaun no Luta hasoru Tráfiku Umanu hetan ona aprovasaun iha votasaun finál globál, iha sesaun parlamentár loron 24 fulan-outubru nian. Iha lei foun ne’e, hatuur medida hirak ne’ebé destina ba prevensaun no kombate tráfiku umanu, no mós ba protesaun no asisténsia ba vítima sira.

Diploma foun ne’e iha mós konsiderasaun ba obrigasaun internasionál sira ne’ebé Estadu Timor Leste asume iha matéria ne’e, liuliu Konvensaun Nasoins Unidas nian kontra Krime Organizadu Tranznasionál no sira-nia Portokolu Adisionál rua kona-ba Kombate Tráfiku Migrante sira liuhusi Rai-maran, Tasi no Aérea no Prevensaun, Represaun no Kastigu kona-ba Tráfiku Umanu, liuliu Feto no Labarik sira.

Daudaun ne’e Governu iha loron 180, sura hahú husi loron ne’ebé Porposta Lei ne’e hahú vigora, atu aprova norma hirak ne’ebé presiza atubele ezekuta lei ne’e, liuliu atu harii Komisaun Luta Antitráfiku Umanu.

Komisaun ne’e, koordena iha nivel nasionál, asaun sira husi entidade oioin ne’ebé sai responsavel ba prevensaun no luta hasoru tráfiku umanu. Komisaun ne’e promove no asegura mós kooperasaun ho entidade estranjeira sira iha kombate hasoru tráfiku umanu no akompaña aplikasaun husi dispozisaun sira husi konvensaun sira ne’ebé Timor-Leste ratifika ona ka sei ratifika iha matéria ne’e.

Komisaun Luta Antitráfiku Umanu maka entidade ne’ebé sai mós responsavel hodi elabora no koordena Planu Nasionál Antitráfiku Umanu, hodi  simu kompeténsia atu halo dinamizasaun no akompañamentu kona-ba ezekusaun medida sira ne’ebé maka hatuur iha planu ne’e nia laran.

Aprovasaun ba diploma legál ida ne’e reprezenta pasu importante ida  tan ba país kona-ba respeitu ba Direitus Umanus. Iha fulan-novembru oin mai, Timor-Leste sei hetan Revizaun Periódika Universál foun husi  Konsellu Direitus Umanus Nasoins Unidas nian.