Ministériu Obras Públikas hahú simbolikamente konstrusaun Ponte Komoro III
Ministru Obras Publikas, Transportes no Komunikasoins, Gastão de Sousa, akompaña husi Embaixadór Japaun nian iha Timor-Leste, Eiji Yamamoto, hala’o lansamentu simbóliku fatuk dahuluk ba konstrusaun Ponte Komoro III, iha Dili, iha loron 17 fulan-outubru tinan 2016.
Maske serimónia ne’e foin hala’o agora, konstrusaun ne’e hahú tiha ona iha loron 4 fulan-juñu tinan 2016 no. Tuir planu obra ne’e sei remata iha loron 31 fulan-agostu tinan 2018.
Konstrusaun ponte ne’e nian sei responsabiliza hosi empreza konstrutora Tobishima no konsórsiu konsultór nian sira hanesan Ingerosec Corporation, Nipon Engineering Consultant Co. Ltd no IDEAS, Inc. Kustu ba konstrusaun hamutuk osan Japaun nian iene millaun 1.690 (dolar amerikanu millaun 16, 171).
Reprezenta Primeiru-Ministru, Gastão de Sousa, hateten katak projetu ne’e realiza tanba kooperasaun entre Governu Timor-Leste no Governu Japaun, ne’ebé fó ajuda liuhusi Ajénsia Japaun nian ba Kooperasaun Internasionál (JICA). “Lori povu Timor-Leste nia naran, ho laran luak tomak, ha’u hakarak agradese Governu Japaun ne’ebé fó ona ajuda atu realiza projetu konstrusaun ne’e nian,” Ministru Gastão de Sousa dehan.
Ministru Gastaun de Sousa hatutan Ponte foun no estrada ida ne’ebé sei liga ponte ne’e sei sai dalan alternativa ida hodi previne problema tránzitu, promove atividade ekonómika no kontribui ba dezenvolvimentu iha kapitál nasaun nian. 
Iha tinan 2013, Governu Timor-Leste harii tan ponte ida, nune’e ponte rua ho dalan rua ne’e uza ba diresaun keta-ketak. Maibé, tuir previzaun husi Banku Dezenvolvimentu Aziátiku (ADB, sigla iha lian inglés) ba tinan 2010-2019, estrada nasionál sira iha Timor-Leste sei hasoru tránzitu veíkulu nian ne’ebé maka’as.
“Tanba ne'e, sai nu’udar kestaun urjente ida, harii ponte foun ida iha Mota Komoro ne'e, atu nune’e bele fahe no jere didi'ak problema tránzitu nian iha sidade Dili no halo prevensaun ba asidente tráfiku”, tenik Ministru.
Marka prezensa iha Serimónia ne’e maka Sekretáriu Estadu Terras no Propriedades, Jaime Lopes Xavier, Prezidente Komisaun C Parlamentu Nasionál, Pedro Mártires da Costa, Prezidente Komisaun E, Deputadu Virgílio Maria Dias Marçal, reprezentante JICA iha Timor-Leste, Hikoyuki UKAI, Diretór Nasionál no Xefe Departamentu sira hosi Ministériu Obras Públikas nian.
