Governu Timor-Leste

Prezidénsia Konsellu Ministrus (PKM) loke formasaun avansada ida iha área lejístika ba jurista timoroan hamutuk 15, hanesan inisiativa importante ida atu atualiza koñesimentu rekursu umanu sira-nian kona-ba halo proposta lei sira. Sekretáriu Estadu Konsellu Ministrus, Avelino Maria Coelho, hamutuk ho Diretór-Jerál Prezidénsia Konsellu Ministrus, Victor Maia, maka dirije sesaun maklokek formasaun ne’e nian, iha loron 17  fulan-outubru, iha Salaun Auditóriu Prezidénsia Konsellu Ministru, Palásiu Governu.

Sekretáriu Estadu Avelino Coelho, iha nia intervensaun, hateten katak “inisiativa PKM nian kona-ba dezenvolvimentu no implementasaun kursu formasaun avansada iha área lejístika nian ne’e, ninia intesaun maka kapasita jurista timoroan hotu-hotu atu nune’e bele tulun Governu ida ne’e hodi prodús lejizlasaun sira”.

“Parlamentu Nasionál mak iha kompeténsia atu halo lei sira, maibé Governu mós iha kompeténsia atu aprezenta proposta Lei sira ba PN hodi hetan aprovasaun, no iha kompetensia balun, aprova lijislasaun sira, hanesan; Dekretu-Lei, Dekretu Governu nian no rezolusaun sira, nuudar materia sira ne’ebé mak lida diretamente ho ministériu sira nia servisu ne’ebé konta ho kuadrus jurista timor-oan sira, dehan Avelino Coelho.

Iha parte seluk, Diretór-Jerál PKM nian, Victor Maia, fó hanoin fila-fali katak formasaun ne’e hala’o ona mós iha Portugal. Kursu dahuluk hala’o durante semana rua nia laran iha Universidade de Lisboa no formandu ne’ebé tuir limitadu. Tanba hala’o iha Dili, kursu daruak ne’e bele envolve mós ministériu sira hotu.

Victor Maia deklara katak ita tenke Ita forma ita-nia jurista nasionál (timoroan sira) para sira bele haklean liután sira-nia koñesimentu, no nune’e bele ajuda Governu ezekuta ninia polítika.  Prezidensia Konsellu Ministru hakarak hala’o programa hirak ne’e bele hasa’e jurista Timoroan sira-nia kapasidade iha sira-nia knaar loro-loron nian. 

PKM foti inisiativa atu halo akordu ida ho Universidade de Lisboa kona-ba formasaun iha área Lejístika nian, ba jurista sira ne’ebé serbisu iha Unidade Apoiu Jurídiku, hodi aproveita mós atu envolve jurista sira husi Ministériu sira seluk. Formasaun ne’e sei hala’o iha loron sanulu nian laran, husi loron 17 to’o 21 fulan-outubru nian no sei kontinua faloi iha loron 7 fulan-novembru nian.

Jurista hamutuk 15, ne’ebé tuir formasaun ne’e, maihosi Gabinete Primeiru-Ministru, Ministériu Estadu Prezidénsia Konsellu Ministrus; Ministériu ba Asuntu Sosiál no Ministériu Edukasaun; Ministériu ba Asuntu Ekonómiku no Ministériu Agrikultura no Peskas, Ministériu Asuntu Administrasaun Estadu no Justisa, Ministériu Negósius Estranjeirus no Kooperasaun, Ministériu Finansas, Ministériu Justisa, Ministériu Saúde, Ministériu Solidariedade Sosiál, Ministériu Komérsiu Indústria no Ambiente, Ministériu Turizmu, Arte no Kultura, no mós Ministériu Petróleu no Rekursus Minerais.