Primeiru-Ministru no komitiva governamentál partisipa iha Asembleia Jerál Nasoins Unidas nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 16 fulan-setembru tinan 2016
Primeiru-Ministru no komitiva governamentál partisipa iha Asembleia Jerál Nasoins Unidas nian
Primeiru-Ministru husik hela Dili iha sábadu ne’e, iha loron 17 fulan-setembru, hodi ba Estadu Naklibur sira Amérika nian [Estadus Unidus Amérika], iha ne’ebé sei partisipa iha Asembleia Jerál Nasoin Unidas no sorumutuk lubun ida no eventu asosiadu sira. Delegasaun ne’ebé akompaña Xefe Ezekutivu Timor nian, inklui Ministru Negósius Estranjeirus no Kooperasaun, Hernâni Coelho, Ministru Petróleu no Rekursus Minerais, Alfredo Pires, no Ministru Planeamentu no Investimentu Estratéjiku, Negosiadór Prinsipál ba ketan-tasik sira no Personalidade Eminente husi g7+, Kay Rala Xanana Gusmão.
Asembelia Jerál, ne’ebé halibur Xefe Estadu no Governu sira iha mundu tomak, no sorumutuk oin-oin no eventu sira ne’ebé hala’o iha tempu ne’e, hato’o biban ida mesak, mak atu promove interese nasionál sira Timor-Leste nian no halo interasaun ho dirijente sira seluk, hanoin na’in no desizór mundiál sira.
Debate sentrál husi Asembleia tinan ida ne’e nian foka liu ba tema:”Objetivu sira Dezenvolvimentu Sustentavel nian: motivasaun universál hodi transforma ita-nia nasaun. “Prevee tiha ona Primeiru-Ministru Timor nian sei halo diskursu iha Debate Jerál ne’e durante sábadu dadeer, iha loron 24 fulan-setembru.
Timor-Leste envolve ona iha elaborasaun ODS (Objetivu sira Dezenvolvimentu Sustentavel nian) no, hafoin nia lansamentu iha Asembleia Jerál iha tinan kotuk, Rui Maria de Araújo fó sai ona katak Timor-Leste sei sai defensór ida ba ninia jeneralizasaun iha mundu tomak, hanesan membru husi Grupu Nivel Aas ne’ebé lidera aplikasaun Ajenda tinan 2030 nian iha ne’ebé integra ba objetivu hirak ne’e.
Iha Estadu Naklibur sira Amérika nian, Primeiru-Ministru no nia delegasaun sei hala’o vizita servisu nian ba Novaiorke, Waxintón, Rhode Island, Massachusetts no Indianápolis. Sorumutuk bilaterál sira ho xefe Estadu seluk, eventu ofisiál paralelu sira, diskursu iha Universidade sira, sorumutuk tuituir malu ho grupu sira, hanesan Asia Society no Atlantic Council, no partisipasaun iha painél debate nian sira sei kontribui ba vizibilidade Timor-Leste no haforsa relasaun internasionál sira.
Portavós Governu nian, Ministru Estadu Agio Pereira, afirma katak “ita moris iha mundu globalizadu iha ne’ebé importante atu promove ita-nia interese ba fatin iha arena internasionál no haforsa ita-nia relasaun ho Estadu no rejiaun sira seluk. Programa boot ne’ebé Primeiru-Minsirtu no delegasaun sira hasoru iha Estadu Naklibur sira Amérika nian sei fó kontribuisaun ida importante ba-iha konkista rezultadu hirak ne’e nian”.
Primeiru-Ministru fila mai Timor-Leste iha loron 29 fulan-setembru. REMATA
