………………………………………………………………………………………………………………
Dili, loron 6 fulan-setembru tinan 2016
Komunikadu Imprensa
Sorumutuk Konsellu Ministrus nian iha loron 6 fulan-setembru tinan 2016 nian
Konsellu Ministrus hala’o sorumutuk iha loron-tersa ne’e, iha Palásiu Govenu, iha Dili, no autoriza ona Ministériu Finansas hodi hahú prosesu Adezaun Timor-Leste nian ba Banku Aziátiku ba Investimentu iha Infraestrutura sira.
Aprova ona mós proposta rua hosi Ministériu Saúde: proposta kona-ba alterasaun ba Dekretu-Lei n.39/2008, loron 29 fulan-outubru nian, ne’ebé aprova Estatutu Laboratóriu Nasionál Saúde nian, ho objetivu atu armoniza estrutura funsionamentu nian sira husi entidade autónoma sira husi servisu nasionál saúde nian, ne’ebé adota sistema remuneratóriu úniku ida ba estrutura administrasaun husi servisu personalizadu sira Ministériu Saúde nian; no proposta kona-ba aumentu subsídiu ba kolaboradór sira husi Brigada Médika Kuba nian iha Timor-Leste, hodibele hasoru ba aumentu despeza operasionál sira ne’ebé maka verifika tiha ona iha tinan ikus hirak ne’e.
Konsellu Ministrus analiza ona projetu Diploma Ministeriál nian ne’ebé sei hamosu rekoñesimentu kona-ba Suku no Aldeia sira iha Timor-Leste, ne’ebé aprezenta husi Ministru Estadu, Koordenadór Asuntu Administrasaun Estadu no Justisa no Ministru Administrasaun Estatál, tuir Lei n. 9/2016, loron 8 fulan-jullu (Lei Suku sira nian), ne’ebé hetan ona aprovasaun husi Parlamentu Nasionál, iha fulan-jullu liubá. Diploma Ministeriál ida ne’e nia objetivu mak atu hadi’a erru sira ne’ebé uluk komete tiha ona iha matéria rekoñesimentu kona-ba Suku no Aldeia sira, no ninia elaborasaun hala’o lihusi konsulta iha nivel Administrasaun Lokál. Projetu ne’e, ne’ebé sei iha lista kompletu kona-ba Suku no Aldeia sira, Ministériu sei publika hafoin halo tiha revizaun, tuir rekomendasaun sira husi Konsellu Ministrus.
Gabinete Ministru Estadu Koordenadór Asuntu Ekonómiku aprezenta ona Eskema Garantia nian ida kona-ba Kréditu ba Empreza Mikro, Ki’ik no Média sira, ho objetivu atu hadi’a asesu empriendedór sira nian ba finansiamentu no, nune’e fó tulun ba dinamizasaun setór privadu. Lejizlasaun kona-ba rejime Garantia Kréditu nian ba Empreza Mikro, Ki’ik no Média sira nian sei halo análize iha tempu badak nia laran, husi Konsellu Ministrus.
Ministru Estadu, Koordenadór Asuntu Sosiál nian no Ministru Edukasaun aprezenta ona sínteze ida husi dadus estatístika sira, husi pólitika no atividade sira ne’ebé daudaun ne’e la’o hela iha Ensinu Sekundáriu Tékniku-Vokasionál (ESTV) nian. To’o oras ne’e haree tiha ona asesu ne’ebé amenta ba ensinu báziku no ensinu sekundáriu – tinan ne’e, rejista ona totál kanorik [estudante] hamutuk 7.938 no manorin [profesór] hamutuk 771 iha eskola 32 husi ESTV, privadu no públiku sira hotu iha país laran tomak. Númeru totál husi eskola sira husi Ensinu Sekundáriu (públika no privada sira, ESTV no Ensinu Sekundáriu Jerál) nian hamutuk 122, ho totál kanorik [estudante] hamutuk 55.998. Konsellu Ministrus analiza ona mós medida hirak ne’ebé Ministériu ne’e propoin ona ba dezenvovimentu ESTV nian, tuir orientasaun sira husi Planu Estratéjiku Dezenvolvimentu tinan 2011-2030 nian no tuir Programa Governu.
Ministru Edukasaun, hamutuk ho Komisaun Nasionál Direitu Labarik nian, hato’o ona mós Planu Asaun Nasionál ba Labarik sira tinan 2016-2020 nian. Planu ne’e mosu iha ámbitu rekomendasaun sira husi Komité Direitu Labarik nian, husi Nasoins Unidas, kona-ba implementasaun Konvensaun Direitu Labarik sira nian. REMATA