Governu Timor-Leste

Fatin: Lisboa, Laboratóriu Polísia Sientífika Polísia Judisiária Portugál nian

Durante semana sanulu, grupu ikus husi peritu forense sira nian na’in lima husi Polísia Sientífika Investigasaun Kriminál (PSIK) Timor-Leste nian, sei hetan posibilidade atu halo estudu avansadu sira kona-ba valénsia Balístika, ho peritu sira husi Polísia Judisiária Portugál nian. Hein katak ho ida ne’e, iha Timor-Leste bele hahú halo ona ezame sira kona-ba komparasaun no análize ba elementu Balistíku sira ho teknolojia ne’ebé avansadu liu, hanesan ho buat ne’ebé Polísia Sientífika sira husi nasaun sira seluk halo.
Integra iha programa formasaun nian ne’ebé asegura husi Komponente Justisa nian husi Programa Apoiu ba Governasaun Demokrátika Timor-Leste, ida ne’e hanesan asaun formasaun nian datoluk iha Investigasaun Kriminál kona-ba Balístika.
Husi kedas tinan 2012 mak Uniaun Europeia delega ona iha Institutu Camões, IP, programa kooperasaun nian ne’e, iha parseira ho Ministériu Justisa Repúblika Demokrátika Timor-Leste nian.
Iha tinan 2014, husi parseira ne’e hamosu PSIK, entidade ne’ebé ohin loron iha ona investigadór 47 no peritu forense nian hamutuk 31, hotu-hotu hetan formasaun iha ámbitu programa ne’e nian, iha estratéjia ida ne’ebé pasa husi formasaun iha Timor-Leste no iha Eskola Polísia Judisiária, iha Portugál.