Governu hato’o nia solidariedade ba Itália

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 26 fulan-agostu tinan 2016

Governu hato’o nia solidariedade ba Itália

Lori povu Timor-Leste nia naran, Governu hato’o kondolénsia ba família no belun sira husi vítima rai-nakdoko nian ne’ebé akontese iha rejiaun sentrál Itália, iha loron-kuarta. Governu hato’o nia solidariedade ba Governu Primeiru-Ministru Matteo Renzi nian no povu Itália, ne’ebé sofre konsekuénsia husi dezastre ne’e.

Rai-nakdoko ne’e halakon ema nia moris no ekipa salvamentu nian sira kontinua buka vítima sira ne’ebé sei moris hela. Sidade oin-oin iha rejiaun Lásiu no Markas (Marche, iha lia-italianu nian) rahun mós iha parte balun tanba rai-nakdoko ne’e.

Governu Timor-Leste nian hahii ba serbisu autoridade sira nian ne’ebé maka haka’as an atu buka tuir no atu salva, iha kondisaun ne’ebé susar tebes-tebes.

Portavós Governu Konstitusionál VI nian, Ministru Estadu Agio Pereira, hateten katak “ami hatene  tuir saida mak akontese daudaun iha Itália. Ami hato’o ami-nia sentimentu ba família sira ne’ebé lakon sira-nia ema hirak ne’ebé sira hadomi no ami hato’o ami-nia saudasaun ba sira ne’ebé maka nafatin buka tuir vítima sira ne’ebé sei moris hela. Timor-Leste solidáriu ho Primeiru-Ministru Matteo Renzi, Governu no povu Itália nian, iha loron difísil hirak ne’e no ba dezafiu sira ne’ebé sei to’o mai iha semana no fulan hirak oin-mai ne’e.”REMATA

   Ba leten