Governu Timor-Leste

Primeiru-Ministru, Rui Maria de Araújo, halo vizita ba Munisípiu Ermera, iha loron 11 fulan-agostu tinan 2016. Objetivu hosi vizita ida ne’e mak atu haree diretamente plantasaun, prosesamentu no diversifikasaun, plantasaun kafé no mós fatin habai kafé mean iha Sentru Formasaun no Estensaun Agríkola Pe. Domingos Sequeira, iha Railaku, Munisípiu Ermera.

Iha Railaku, Ermera, diversifikasaun ba ai-fuan oin sanulu-resin no ai-horis sira maka hanesan; has, longan (klengken), jambu-air, kulu, ai-ata, rambutan, ai-teka, pimenta no baunilla. Iha fatin ne’e, Primeiru-Ministru mós vizita ba iha sentru viveirus hanesan kakau, kafé robusta, kafé arábika, ai-kakeu no kraviñu.

Xefe Governu nian hateten katak kafé oras ne’e produtu esportasaun Timor nian daruak, esportasaun boot liu maka mina no gas. Ita presiza haree daudaun ona kona-ba prosesu sertifikasaun kafé, liuliu kafé orgániku, atubele tama ba-iha merkadu internasionál.

“Iha mundu tomak ema rekoñese ona kafé timor ninia kualidade no marka. Iha rede kafé nian hanesan “StarBurks” no iha Amérika ema hirak ne’ebé fa’an kafé dehan ita-nia kafé ne’e orgániku. Ida ne’e signifika katak iha potensialidade atu dezenvolve maka’as liután Kafé Timor tanba kafé ne’e espesiál. Tanba ne’e Governu tenke kria kondisaun no inisiativa sira atu Kooperativa Kafé Timor (CCT) bele aumenta liután saida maka CCT halo atu bele hetan rezultadu no benefísiu di’ak liután ba ita-nia agrikultór kafé nian sira”, Primeiru-Ministru dehan.

Iha Glenu, Xefe Governu ba vizita Clínica Café Timor no East Timor Coffee Institute (ETCI) hodi haree plantasaun kafé íbridu.

Ikus liu, Primeiru-Ministru vizita ba fatin prosesamentu kafé ne’ebé foin ku’u hotu iha Suku Estadu. Primeiru-Ministru  no nia komitiva mós hola parte ku’u kafé tasak no haree diretamente serbisu ne’ebé maka CCT halo, hahú hosi ku’u kafé, prosesamentu ho makína ne’ebé maka suporta hosi nasaun Índia. Fase hotu tiha, kafé sira ne’e sei  ba habai iha Tibar durante loron 5-6 no ikus liu lori ba iha CCT Akadiru-hun Dili, hodi halo preparasaun ba esportasaun.

Iha vizita ne’e, Primeiru-Ministru akompaña hosi Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, Adjuntu Embaixadora Estadus Unidus Amérika, Embaixadora hosi Nova Zelándia, reprezentante hosi NCBA Washington ninian, Diretór no ekipa hosi CCT.