Governu Timor-Leste

Governu halo lansamentu esportasaun dahuluk kraviñu (cengkeh) Timor-Leste nian, iha loron 5 fulan-agostu 2016, iha instalasaun prosesamentu kafé Kooperativa Kafé Timor nian (KKT), iha Akadiru-Hun, Dili.

Objetivu ba lansamentu ne’e maka atu dezenvolve produtu sira ne’ebé mak iha valór esportasaun aas hanesan kakau, aifuan, aifariña, baunilla, pimenta metan no kraviñu iha Baukau, Vikeke, Lautein, Aileu no Ermera. Lansamentu ne’e hanesan parte ida hosi projetu ne’ebé finansia hosi Governu Estadus Unidus Amérika nian ne’ebé implementa hosi nasionál kooperativa Business Association (NCBA) no Kooperativa Kafé Timor (CCT).

Dadaun ne’e Kooperativa Kafé Timor serbisu hamutuk ho kompaña McCormick hodi esporta kraviñu ba Estadu Unidus Amérika liuhosi kompaña McCormick ida ne’ebé maka kompaña esportadór boot liu iha mundu.

Primeiru-Ministru, Rui Maria de Araújo hateten katak kooperativa ida molok atu sosa produtu agrikultura tenke halo uluk ligasaun ho instituisaun internasionál sira hodi garante katak iha merkadu ida ba produtu sira ne’e, nia hatete mós katak ne’e la’ós servisu ida ne’ebé fásil maibé CCT durante ida ne’e hala’o no hatudu tiha ona dalan.

Partisipante sira  serimónia ne’e nian maka hanesan Primeiru-Ministru, Dr. Rui Maria de Araújo, Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, Embaixadora Estadu Unidus Amérika, Karen Stanton, Embaixadora hosi Nova Zelándia, reprezentante hosi NCBA, reprezentate hosi kompaña McCormick no lider sira hosi Kooperativa Kafé Timor.