Primeiru Ministru Kamboja nian iha Dili atu hametin relasaun bilaterál sira

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 17 fulan-agostu tinan 2016

Primeiru Ministru Kamboja nian iha Dili atu hametin relasaun bilaterál sira

Primeiru- Ministru Reinu Kamboja nian, Samdech Akka Moha Sena Padei Techo Hun Sen, to’o iha Dili iha sesta, loron 19 fulan-agostu, ba vizita ofisiál durante loron rua nian iha Timor-Leste. Primeiru-Ministru, Rui Maria de Araújo, hateten katak vizita ne’e nia hein ho espetativa, tanba sai hanesan biban ida atu hametin relasaun entre Timor-Leste no Kamboja. Governante na’in rua ne’e hasoru malu tiha ona iha Malázia iha tinan ida ne’e, durante Fórum Ekonómiku Mundiál kona-ba ASEAN.

Governu Konstitusionál VI, tuir ninia Programa Governu nian, serbisu ona atu hadi’a relasaun bilaterál Timor-Leste nian ho parseiru rejionál sira hotu no, durante preparasaun adezaun ba ASEAN (Asosiasaun Nasaun sira Sudeste Aziátiku), garante ona operasionalidade husi ita-nia Embaixada sira iha Estadu-membru sanulu iha Asosiasaun rejionál ida ne’e.

Embaixadora Timor-Leste nian ba Reinu Kamboja, Felicidade de Sousa Guterres, aprezenta ona karta kredensiál sira iha Phnom Penh, iha kapitál Kamboja nian, iha fulan-abríl tinan ida ne’e. Primeiru-Ministru Hun Sen observa ona katak loke Embaixada iha Kamboja reflete intensaun nasaun rua ne’e nian atu hadi’a sira-nia relasaun. Antigu Primeiru-Ministru, Kay Rala Xanana Gusmão, vizita ona Reinu Kamboja iha tinan 2013.

Durante ninia vizita ofisiál mai Timor-Leste, Primeiru-Ministru Hun Sen no ninia delegasaun sei debate kona-ba área kooperasaun nian sira entre país rua ne’e no sei asina akordu balun kona-ba kooperasaun ekonómiku no tékniku, nune’e mós rekizitu sira iha matéria vistu no interkámbiu iha domíniu serbisu nian. Delegasaun Kamboja nian tau ona iha nia ajenda sorumutuk ida ho Kámara Komérsiu Timor-Leste nian, atubele debate kona-ba biban atu hametin kooperasaun rejionál. Primeiru-Ministru Hun Sen ho ninia delegasaun sira sei fó omenajen ba Timor-Leste, hodi vizita Jardín Erói sira nian iha Metinaru no hodi partisipa iha komemorasaun sira kona-ba Loron FALINTIL nian, ne’ebé sei hala’o iha loron 20 fulan-agostu.

Portavós Governu Konstitusionál VI nian, Ministru Estadu Agio Pereira, hateten katak “Timor-Leste simu ho laran haksolok Primeiru-Ministru Hun Sen ho ninia ilustre delegasaun. Ami kaer-metin biban ne’e hodi hametin liután ami-nia lasu amizade nian ho Reinu Kamboja nian no ami sente haksolok ho partisipasaun husi ami-nia vizitante sira iha komemorasaun Loron FALINTIL nian. Timor-Leste nafatin hametin relasaun ho ninia viziñu sira hotu, hodi halo buat hotu ne’ebé bele halo atu kolabora iha nia preparasaun ba ninia adezaun rasik ba ASEAN” REMATA

   Ba leten