Konferénsia Sosiedade Sivíl ASEAN nian / Fórum povu sira ASEAN nian ba tinan 2016 termina ona iha Dili
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 9 fulan-agostu tinan 2016
Konferénsia Sosiedade Sivíl ASEAN nian / Fórum povu sira ASEAN nian ba tinan 2016 termina ona iha Dili
Konferénsia Sosiedade Sivíl ASEAN/Fórum povu sira ASEAN nian ba tinan 2016 remata ona iha Dili, iha ne’ebé reprezentante oin-oin sira, ne’ebé mai husi nasaun sira Asosiasaun Nasoins Sudeste Aziátiku (ASEAN) nian halibur hamutuk. Bazeia ba pedidu husi organizadór sira, eventu loron tolu ne’e inklui aprezentasaun sira husi membru Governu sira, ba dala uluk, dada-lia nakloke ida (diálogo aberto) ho Primeiru-Ministru, Rui Maria de Araújo.
Plenáriu Forum ne’e nian hahú iha kuarta, loron 3 fulan-agostu, iha ne’ebé Primeiru-Ministru simu ho laran haksolok vizitante atus ba atus ne’ebé mai no hatudu sira-nia “agradesimentu ne’ebé kle’an” ba pontu sanulu-resin-neen ne’ebé hakerek iha Deklarasaun Fórum ne’e nian ba tinan 2016, ne’ebé Komisaun Koordenasaun Rejionál maka fó sai, liuliu iha matéria “solidariedade ne’ebé kontinua ho ami-nia istória ne’ebé komplikadu, seidauk hakotu de’it, atu restaura ami-nia soberania tasik [marítima] iha Tasi Timor”.
Primeiru-Ministru foka liu bá knaar importante husi sosiedade sivíl “ativu” Timor-Leste nian “iha prosesu konstrusaun nasaun no konstrusaun Estadu”, no ko’alia kona-ba relasaun entre Governu no sosiedade sivíl, hanesan relasaun ne’ebé simu malu, nakloke no foka ba interese nasaun nian sira ne’ebé maka di’ak liu. Xefe ezekutivu ne’e koa’lia mós ba forma oinsá Governu envolve an ho Sosiedade Sivíl kona-ba “lejizlasaun no polítika públika sira ne’ebé iha impaktu ba sosiedade nia moris” no progresu husi mekanizmu “auditoria sosiál”, ne’ebé, serbisu hamutuk ho sosiedade sivíl, hakarak “garante efisiénsia no efikásia husi servisu sira ne’ebé Governu halo”.
Ministru Planeamentu Estratéjiku no Investimentu no Negosiadór Prinsipál ba Ketan Tasik (Fronteira Marítima) sira, Kay Rala Xanana Gusmão, dehan ba delegadu sira iha loron ikus konferénsia ne’e nian, hodi fó aten-barani ba ema hotu atu “komemora susesu ASEAN nian no mudansa ne’ebé organizausan ne’e lori ona mai iha ita-nia rejiaun”, hodi garante “katak ema mak iha sentru mudansa ne’e nian”. Ministru Gusmão mós envolve an iha dada-lia nakloke ida ho partisipante sira.
Sekretáriu Estadu Juventude no Desportu, Leovigildo Hornay, dehan iha eventu finál konferénsia nian, ne’ebé hanaran “Kalan Solidáriu”, hamutuk ho eis-Prezidente no eis-Primeiru-Ministru, José Ramos-Horta, ne’ebé hato’o ninia respeitu ba ativista barak ne’ebé fó ona sira-nia solidariedade durante luta Timor nian, no hatudu ninia laran-metin katak, Timor-Leste dezenvolve ona nia an to’o oras ne’e hanesan sosiedade ida ne’ebé simu malu, halibur parte hotu-hotu nia hanoin no respeitu-na’in ba fiar ema seluk nian.
Lori Governu nia naran, Ministru Estadu Agio Pereira hato’o nia laran haksolok ba ema hotu ne’ebé envolve iha susesu Konferénsia Sosiedade Sivíl ASEAN nian/Fórum Povu sira ASEAN nian ba tinan 2016 no hahii organizasaun Sosiedade Sivíl Timor-Leste nian hotu ba sira-nia knaar importante no metin nafatin iha konstrusaun Nasaun nian. REMATA
