Governu apoiu ekipa olímpika Timor-Leste nian iha Riu tinan 2016
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 4 fulan-agostu tinan 2016
Governu apoiu ekipa olímpika Timor-Leste nian iha Riu tinan 2016
Bainhira serimónia abertura Jogu Olimpíada XXXI hahú, iha Brazíl, iha loron 5 fulan-agostu, bandeira Timor-Leste semo aas iha kalohan Riu-de-Janeiru nian, iha Estádiu Marakanã. Governu sente orgullu hodi fó apoiu ba partisipasaun Timor-Leste nian iha Jogu sira ne’e, ho Francelina Marques Cabral kompete iha siklizmu XCO (“cross-country”), Nélia Martins iha metru 1500 feto nian no Augusto Ramos Soares iha metru 1500 mane nian.
Durante serimónia maklokek nian, iha sesta kalan, atleta na’in tolu ne’e no delegasaun ki’ik ne’ebé akompaña sira sei hatudu ho orgullu bandeira Timor-Leste nian iha audiénsia mundiál ida ne’ebé, tuir estimativa, iha ema millaun rihun ida nia oin.
Primeiru-Ministru, Rui Maria de Araújo, hato’o parabéns ba ekipa no konsidera katak ekipa sira nia partisipasaun sei reforsa konsiénsia internasionál kona-ba Timor-Leste, hanesan biban mesak ida hodi reprezenta nasaun iha membru nasaun sira seluk ne’ebé iha Riu. Governu apoiu orsamentu ba atleta sira nia viajen ba Riu-de-Janeiru, apoiu ba partisipasaun iha asaun preparasaun sira no dezenvolve ona, iha Timor-Leste, infraestrutura preparasaun fízika sira no umana iha modalidae hirak ne’ebé sira reprezenta.
Bainhira sira to’o ba Riu-de-Janeiru, iha loron 29 fulan-jullu, ekipa Timor-Leste treina nafatin to’o oras ne’e no adapta ona ho kondisaun lokál sira. Eventu sira atletizmu nian, ba Nélia Martins no Augusto Ramos Soares, sei hala’o iha loron 12 no 16 fulan-agostu no halai taru bisikleta XCO Francelina Marques Cabral nian iha loron 20 fulan-agostu.
Atensaun mundu tomak nian relasiona ba istória Timor-Leste, reforsa maka’as tebes bainhira atleta na’in haat ne’ebé partisipa, hanesan individu, iha Jogu sira Sydney nian, iha tinan 2000. Iha momentu ne’e kedas, Timor-Leste partisipa ona ofisiál, iha Jogu Bailoro (Verão) nian iha tinan 2004 iha Atenas, tinan 2008 iha Pekin no tinan 2012 iha Londres. Tinan ida ne’e, iha Riu, hanesan Olimpíada ba datoluk ba Augusto Ramos Soares, ne’ebé mak uluk kompete ona iha maratona, iha tinan 2008 no tinan 2012.
Portavós Governu Konstitusionál VI nian, Ministru Estadu Agio Perreira, hatete katak: “Hodi Governu nia naran, ami hato’o parabéns ba atleta olímpiku Timor-Leste nian ba sira nia serbisu maka’as no sira ninia dedikasaun. Sira nia desportu ne’ebé di’ak tebtebes lori ona sira, iha biban ida ne’e, atu bele partisipa iha Jogu Olímpiku sira iha Riu no orgullu boot tebes ba ita, tanba sira bele reprezenta ita-nia nasaun. Ita husu atu sira bele hetan susesu maka’as.” REMATA
