Sorumutuk Konsellu Ministrus nian iha loron 2 fulan-agostu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 2 fulan-agostu tinan 2016
Komunikadu Imprensa
Sorumutuk Konsellu Ministrus nian iha loron 2 fulan-agostu tinan 2016
Konsellu Ministrus hala’o sorumutuk loron-tersa ne’e, iha Palásiu Governu, iha Dili, no aprova ona diploma sira oioin, ne’ebé parte barak husi diploma sira ne’e, aprezenta ona husi Ministru Estadu, Koordenadór Asuntu Administrasaun Estadu no Ministru Administrasaun Estatál.
Husi diploma sira ne’e hetan ona aprovasaun: Rezolusaun Governu nian kona-ba nomeasaun membru sira husi Komité Revizaun Polítiku, ne’ebé inklui kalendáriu sorumutuk sira ba revizaun Orsamentu Jerál Estadu nian ba tinan 2017; Rezolusaun Governu nian kona-ba Polítika Fortalesimentu Institusionál tinan (2016-2030) no kria grupu traballu ida hodi akompaña no halo avaliasaun ba ezekusaun polítika ne’e nian, ne’ebé iha prinsípiu sanulu atu fó orientasaun ba setór públiku hodi hadi’a prestasaun servisu, ne’ebé apoia objetivu jerál Governu nian kona-ba “Vizaun Ida, Planu Ida, Asaun Ida”, no nune’e mós Rezolusaun Governu nian kona-ba estratéjia investimentu ba jestaun fo’er isin urbanu sira Dili nian, inklui serbisu rekolla no armazenamentu, resiklajen no fatin ikus nian ne’ebé so’i duni hodi ta’u fo’er isin urbanu sira.
Ministériu Administrasaun Estatál mós analiza ona projetu sira kona-ba Modelu Planu Asaun nian, Modelu Orsamentu Munisipál no Modelu Kontratu Administrativu Interorgániku sira. Instrumentu sira ne’e importante tebes hodi hahú prosesu deskonsentrasaun administrativa no hodi hadi’a kualidade bein no servisu públiku sira ne’ebé fó ba populasaun sira. Konsellu Ministrus aprova ona grupu traballu nian ida ba revizaun proposta orsamentál sira ne’ebé aprezenta husi ministériu sira, ho objetivu atu fó hikas orientasaun verba nian ba orsamentu munisipál nian sira.
Dekretu-Lei kona-ba regra sira hodi asesu no klasifikasaun ba dokumentu ofisiál sira, ne’ebé aprova ona iha sorumutuk Konsellu Ministrus nian, iha loron 24 fulan-maiu liubá, hetan fali ona apresiasaun no aprova ona husi Konsellu Minsitrus, hodi konsidera ba rekomendasaun sira ne’ebé hato’o husi Prezidente Repúblika.
Konsellu Ministrus mós aprova ona proposta rua husi Ministériu Defeza nian. Ida koa’lia kona-ba nomeasaun ba komandante foun sira husi komponente Forsa Armada nian sira, ne’ebé hato’o husi Xefe Estadu Maiór Jenerál F-FDTL nian. Ida seluk fali hato’o rekondusaun Koronel Domingos Raúl (Falur Rate Laek) nian ba kargu Xefe Estadu Maiór F-FDTL. Proposta hirak ne’e agora sei haruka ba Prezidente Repúblika hodi hetan apresiasaun.
Sekretária Estadu ba Apoiu no Promosaun Sósiu-Ekonómika Feto nian, fó hanoin ona kona-ba nesesidade ministériu sira hodi elabora orsamentu ida no planu sensivel sira ba jéneru, hodi kumpri ba meta ne’ebé define ona iha Objetivu Dezenvolvimentu Sustentável, rekomendasaun sira Konvensaun nian kona-ba Eliminasaun husi Forma hotu-hotu kona-ba Diskriminasaun kontra Feto (akrónimu iha lia-inglés:CEDAW) no ba objetivu sira husi Planu Estratéjiku Dezenvolvimentu tinan 2011-2030 nian. Sekretária Estadu ne’e sei halo aprezentasaun ba proposta ida hodi dezenvolve mekanizmu komún ba ministériu hotu-hotu, ne’ebé fó dalan atu avalia evolusaun anuál ba meta sira ne’e.REMATA
