Ministru Justisa partisipa iha debate kona-ba Projetu Apoiu ba Konsolidasaun Estadu Direitu

Kin. 23 juñu 2016, 12:30h
MJ_REUNIAUN_KOOPERASAUN_PALOP_IHA_LISBOA_23_JUN_2016_2

Ministru Justisa Repúblika Demokrátika Timor Leste (RDTL), Ivo Valente, partisipa iha Komité Pilotajen Projetu Apoiu ba Konsolidasaun Estadu Direitu (PACED, sigla iha lian portugés) , ne’ebé dirije ba Países Africanos de Língua Oficial Portuguesa (PALOP) no Timor-Leste iha Lisboa, Portugál, iha lkinta, loron 23 fulan-juñu 2016.

Partisipa iha sorumutuk ne’e Ministru Justisa sira aleinde Komisáriu Komisaun Anti Korupsaun no Dirijente Banku Sentrál sira, husi Timor-Leste, Portugál, Angola, Giné-Bisau, Kabuverde, Mosambike no mós Saun Tomé no Prínsipe.

Objetivu husi sorumutuk ne’e mak atu halo planu hamutuk hodi hadi’a kapasidade nasaun membru [PALOP[ sira nian iha prevensaun no luta hasoru korrupsaun, krime fase osan no krime organizadu no oinsá buka solusaun ba krime tráfiku sira.

Hafoin halo análize, nasaun idak-idak halo apresiasaun no aprova planu globál servisu bienál ka serbisu ne’ebé maka sei hala’o ba períodu tinan rua, 2016 to’o2017. MJ_REUNIAUN_KOOPERASAUN_PALOP_IHA_LISBOA_23_JUN_2016_1

Planu ne’e hetan apoiu hosi Uniaun Europeia, liuhusi Camões – Instituto da Cooperação e da Lingua Portuguesa, no foka liu ba oinsá hadi’a kuadru jurídiku hodi regula organizasaun administrativa no moderniza tuir prátika internasionál.

Iha sorumutuk ne’e mós konsege aprova planu kona-ba hasa’e funsionamentu institusionál no kapasidade rekursu umanu nasaun membru sira nian, hodi haforsa prosedimentu operasionál no dezenvolve kooperasaun no kolaborasaun nasaun sira iha ámbitu PALOP no Timor-Leste ho organizasaun internasionál sira.

Akompaña Ministru Ivo Valente iha sorumutuk ne’e maka Komisáriu Komisaun Anti Korrupsaun (KAK), Adérito António Tilman, Diretór Ezekutivu Unidade Informasaun Finanseira Banku Sentrál Timor-Leste (BCTL, sigla iha dalen portugés), Maria José Sarmento, Xefe Gabinete Ministru Justisa, Evangelino Belo, Juíz Administradór Tribunál Dili, Duarte Tilman, Asesór Jurídiku Gabinete Ministru Justisa, João Pedro Campos no Asesór Komunikasaun Sosiál Gabinete Ministru Justisa, Joãozito Viana.

   Ba leten