Governu Timor-Leste

Unidade Refinaria no Servisu Petrolíferu empreza nasionál petróleu TIMOR GAP nian inagura ona ninia postu abastesimentu kombustível nian dahuluk, iha parte tasi-mane nian – iha Suku Kamanasa, iha Munisípiu Kovalima, iha loron 29 fulan-abríl tinan 2016.

Lokaliza besik ba aeroportu Suai nian, postu kombustível TIMOR GAP nian ne’e iha funsionáriu lokál hamutuk na’in 14, ne’ebé simu ona formasaun iha empreza enerjia husi Indonézia Pertamina, iha Surabaia, iha Indonézia. Projetu ne’e no ninia lokalizasaun hetan aprovasaun tiha ona husi Autoridade Nasionál Petróleu no Minerál (ANPM) no infraestrutura ne’e kumpre rekizitu internasionál sira.

Ida ne’e hanesan marka importante ida ba Kompañia Nasionál Petróleu nian, ne’ebé, ho inisiativa  ne’e, atu bele haree marka kombustivel sira nian foun ida, TIMOR GAP, hodi kompleta ona etapa dahuluk husi objetivu ida husi hirak ne’ebé define ona ba setór transporte, refinasaun no distribuisaun petróleu nian.

Serimónia ne’e konta ho prezensa husi autoridade lokál sira, tradisionál sira (lia-na’in) no nasionál sira, entre bainaka kurakuran atus ida ne’ebé mai. Figura sira ne’ebé marka prezensa iha eventu ne’e maka Ministru Petróleu no Rekursu Minerál, Alfredo Pires, Prezidente TIMOR-GAP, Francisco Monteiro, Vise-Prezidente ANPM, José Goncalves, Administradór Munisípiu Kovalima, José Pina, membru sira Polísia Nasionál Timor-Leste nian no mós reprezentante sira Pertamina nian.