Governu Timor-Leste

Tinan-tinan mundu komemora loron traballu infantil, katak loron atu hanoin kona-ba realidade iha mundu rai klaran, neébé relasiona ho labarik sira ne’ebé tenki hahú serbisu ona, iha idade ne’ebé nurak. Loron ne’e monu iha loron 12 fulan junho, no iha loron ida ne’e, hodi Governu nia naran hakarak hato’o mensajem kona-ba traballu infantil.

Realidade ne’ebe hahu mosu iha ita rain, mak labarik barak ho idade sei nurak, halo servisu hirak ne’ebe mak tuir lolo’os ema bo’ot ka ema adultu maka halo. Iha labarik barak ne’ebe obrigadu tenke hala’o servisu iha natar, iha to’os ka fa’an sasan merkadu ka iha luron, iha foho no mós iha sidade. Tan sá maka sira halo ida ne’e? Tan sá sira la iha eskola, maibé tenki halo serbisu ho idade sei nurak? Sira nia inan-aman iha nebé?

Familia, sosiedade no nasaun tomak tenki hatene oin-sa for resposta ba pergunta hirak ne’e.

Familia ida-idak, aman no inan, tenki asumi responsabilidade hodi haki’ak ona sira, fo’o oportunidade atu sira bele halimar no eskola, hanesan mos ho labarik sira seluk. Sira nia tempu atu sebisu sei to’o mai aban-bain-rua. Sira presiza prepara sira nia a’an atu aban-bain-rua bele serbisu di’ak liu, wainhira sira tama ona idade adultu. Sosiedade presiza hamosu sensibilidade atu labele tolera situasaun hirak ne’ebé husik labarik sira serbisu hanesan fali ema bo’ot, em vez de ba eskola, prepara sira nia a’an ba futuru. Labarik sira tenki ajuda  sira nia inan aman halo serbisu ki’ik-oan iha umalaran, maibé la’os sira maka atu serbisu fali iha ema bo’ot sira nia fatin, hanesan iha tós, natar, fa’an sasán iha merkadu, ka luron no buat seluk tan.

Estadu hamosu ona lei no mekanismu implementasaun balun hanesan Resolusaun Parlamentu Nasional nº9/2009, hodi ratifika konvensaun organizasaun internasional traballu nian, ho objetivu atu halakon traballu infantil. Governu mos estabelese ona Komisaun Nasional Hasoru Traballu Infantil ne’ebé halibur hamutuk reprezentante husi Governu, organizasaun traballador sira nian, no organizasaun ema hirak ne’ebé fo’o serbisu ba ema seluk ka empregador sira, hodi buka oin-sa implementa konvensaun organizasaun internasional traballu nian.

Mekanizmu hirak ne’ebé estadu hamosu ninia objetivu maka hodi fasilita sosiedade no familia sira atu hado’ok sira o’an husi traballu infantil. Estadu mesak, sei labele hado’ok labarik sira husi traballu infantil. Familia, Sosiedade no Estadu hamutuk, maka bele hado’ok labarik Timoroan sira husi traballu infantil, no prepara sira ba futuru ida ne’ebé di’ak liu.

Labarik sira nia fatin la’os iha natar, to’os, ka fa’an sasan iha merkadu ka iha luron.

 Labarik sira nia fatin maka iha eskola, nu’udar fatin atu aprende, fatin atu halimar no hala’o konvivensia ho labarik seluk, fatin atu buka matenek hodi aban-bain-rua bele kontribui ba desenvolvimentu Nasaun no Estadu Timor-Leste.

Mai ita hotu haka’as-a’an atu hado’ok labarik sira husi traballu infantil.

Ida ba hotu-hotu! Hotu-hotu ba Ida.