Governu Timor-Leste

Durante sorumutuk ida iha loron rua nia laran ho tema “Sistema prizaun nian sira, reinsersaun sosiál no direitus umanus”, kuadru aas liu sira husi administrasaun prizaun nian no penitensiária nian husi nasaun hirak ne’ebé partisipa iha Konferénsia Ministru Justisa Nasaun sira Lian Ofisiál Portugés (CMJPLOP), sigla iha lian portugés define ona papél Konsellu Diretór Servisu Prizaun sira ninian iha ninia área intervensaun nian. Objetivu prinsipál maka promove kooperasaun sientífika, pedagójika, téknika, operasionál, kulturál no sosiál entre Servisu Prizaun nian no Penitensiária nian sira husi nasaun membru sira.

Sorumutuk da-1 Konsellu Diretór sira Servisu Prizaun CMJPLOP nian ne’e taka husi Sekretária-Jerál Konferénsia Ministru Justisa Nasaun sira Lian Ofisiál Portugés, Nelinho Vital, iha loron 10 fulan-maiu liubá. Partisipa iha sorumutuk ne’e, Diretór Nasionál Servisu Prizaun no Reinsersaun Sosiál Ministériu Justisa Timor-Leste, Hélder Cosme Marçal Belo, Diretora Polítika Penitensiária Ministériu Justisa Brazíl nian, Valdirene Daufemback, Diretora-Jerál Jestaun Prizaun sira no Reintegrasaun Sosiál Ministériu Justisa Kabu Verde nian, Maria Paula Santos Fortes, Diretór-Jerál Servisu Nasionál Prizaun Ministériu Justisa Giné-Bisau nian, Mussá Baldé, Diretór-Jerál Servisu Penitensiáriu Ministériu Justisa Mosambike nian, Eduardo Sebastião Mussanhane, Diretór-Jerál Reinsersaun no Servisu Prizaun sira Ministériu Justisa Portugál nian, Celso José das Neves Manata, no diretór-Jerál Servisu Prizaun sira Saun Tomé no Prínsipe, Anastácio de Ceita Quaresma.

Sorumutuk ne’e nu’udar kumprimentu ba deliberasaun ne’ebé hasai iha Konferénsia Ministru Justisa XIV, ne’ebé hala’o ona iha Dili, iha fulan-juñu tinan 2015, iha sekuénsia husi proposta  ne’ebé aprezenta ona durante sorumutuk Ministru Interiór sira-nian iha fulan-novembru tinan 2011, iha Luanda.