Governu Timor-Leste

Polísia Sientífika Investigasaun Kriminál (PSIK) selebra ninia aniversáriu da-2, iha loron 16 fulan-maiu. Durante serimónia ne’ebé realiza iha Auditóriu Ministériu Solidariedade Sosiál, iha Caicoli, Dili ne’e, fó pose mós ba Adjuntu Diretór Nasionál PSIK nian foun, Adino Nunes Cabral, nune’e mós elementu sira seluk instituisaun ne’e nian.

Iha ninia diskursu, Ministru Justisa, Ivo Valente, hateten katak kriasaun PSIK nian “iha justifikasaun tomak hasoru dezafiu sira ne’ebé nasaun ne’e hasoru. Ita tenke preparadu ba forma kriminalidade nian foun sira, ne’ebé komplidaku no organizadu liu, no ne’ebé ezije entidade polisiál sientífika ida, ne’ebé independente no estruturada, ho kuadru sira ne’ebé mak iha espesializsaun aas, iha instrumentu tékniku ne’ebé di’ak, nu’udar ita bele haree iha ami-nia laboratóriu polísia sientífika nian”.

Nia hatutan mós katak serbisu organizmu polisiál ida ne’e nian “sei labele hala’o bainhira la iha espirítu unidade no misaun nian ida ne’ebé forte, komún ba pesoál hotu-hotu ne’ebé integra ba PSIK, hanesan, korpu espesiál husi karreira investigasaun kriminál nian no korpu espesiál karreira espesialista sira nian. Ba sira hotu, ita tenke, hamutuk ho sosiedade Timor nian, hatudu ita-nia nia koñesimentu ne’ebé kle’an”.

Ministru Ivo Valente hahi’i papél ne’ebé dezenpeña hosi Programa Justisa nian, kooperasaun ne’ebé Uniaun Euopeia delega iha Portugál, liuhusi Camões – Instituto da Cooperação e da Língua, IP, ne’ebé “iha buat barak maka tenke fó onra ba Uniaun Europeia no Kooperasaun Portugeza, nune’e mós ho parseiru sira seluk projetu ne’e nian, hanesan Diresaun-Jerál Polítika Justisa no, liuliu, Polísia Judisiária”.

Ho jeitu konkluzaun nian, nia hateten katak “xave susesu PSIK nian nian sei depende ba forma oinsá ita hatán ba nesesidade sira”.

Iha parte lokraik nian, hala’o Semináriu Nasionál ne’ebé konta ho intervensauN oin-oin. Ida dahuluk kona-ba “Polítika Governu nian atu hametin investigasaun kriminál nian iha PSIK”, ne’ebé responsabiliza husi Ministru Ivo Valente. Tuir FALI maka intervensaun husi prezidente Komisaun-A Parlamentu Nasionál nian, kona-ba “Polítika Lejizlativa iha organizasaun investigasaun kriminál nian”. Sira seluk ne’ebé aprezenta mós intervensaun maka Prokuradora Repúblika, Angelina Saldanha, ho tema “Investigasaun kriminál iha krime sira hanesan tráfiku droga no fase-osan (brankeamentu kapitál)” Komisáriu Anti-Korupsaun, Adérito Tilman, kona-ba “Efikásia no afisiénsia husi investigasaun kriminál iha krime korrupsaun nian”, Diretór Adjuntu PSIK nian, Adino Nunes Cabral, ko’alia kona-ba “Kriminalidade organizada”, no Xefe Departamentu Medisina Forense Ospitál Nasionál Goidu Valadares nian, Nilton Tilman, ko’alia kona-ba “Investigasaun kriminál no medisina jerál”.

Serimónia ne’e prezide husi Ministru Estadu, Koordenadór Asuntu Administrasaun Estadu no Justisa, Dionísio Babo, no husi Ministru Justisa, Ivo Valente, no konta mós ho prezensa husi Ministru Defeza nian, Cirilo Cristóvão, no husi Ministru Interiór, no mós husi reprezentante aas sira husi instánsia jurisdisionál Timor-Leste nian sira, hanesan Tribunál Rekursu, Prokuradoria-Jerál Repúblika nian, Komisaun Anti-Korrupsaun, Defensoria Públika no Komisaun Funsaun Públika, no mós husi reprezentante diplomátiku sira no husi estrutura emprezariál.