Xanana Gusmão aprezenta Konsiliasaun Obrigatóriu ba Sekretáriu-Jerál Nasoins Unidas nian

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 14 fulan-abril tinan 2016

Xanana Gusmão aprezenta Konsiliasaun Obrigatóriu ba Sekretáriu-Jerál Nasoins Unidas nian

Iha loron 13 fulan-abríl, iha sede Nasoins Unidas nian, iha Novaiorke, Ministru Planeamentu no Investimentu Estratéjiku no Negosiadór Prinsipál Timor-Leste nian ba Fronteira Tasi nian sira, Kay Rala Xanana Gusmão, hasoru malu ho Sekretáriu-Jerál Nasoins Unidas nian, Ban Ki-Moon.

Iha loron-segunda dadeer, Timor-Leste fó hatene ona ba Governu Austrália nian katak Timor-Leste hahú tiha ona prosedimentu sira atu nasaun rua ne’e tama ba-iha prosesu Konsiliasaun Obrigatóriu, tuir Convenção das Nações Unidas sobre o Direito do Mar (CNUDM) [Konvensaun Nasoins Unidas nian kona-ba Direitu Tasi nian (KNUDT)].

KNUDT ezije atu nasaun sira ne’ebé disputa malu hela buka tuur hamutuk hodi ko’alia no define fronteira tasi nian sira ne’ebé permanente, iha prosesu formál ida, dirije husi painél ida husi peritu independente sira, ne’ebé koñesidu ho Komisaun ba Konsiliasaun.

Ministru Xanana Gusmão hateten katak “prosesu ne’e fó dalan ba Komisaun ne’e hodi tulun nasaun rua ne’e atubele hetan solusaun amigável ida kona-ba fronteira tasi nian sira permanente”.

Portavós Governu Konstitusionál VI, Ministru Estadu Agio Pereira, hateten katak “Timor-Leste tau  fiar tomak ba Nasoins Unidas no sistema internasionál. Direitu Internasionál fó dalan atu rezolve konflitu sira ho dame no proteje direitu nasaun kiik sira nian. Tanba Austrália lakohi nafatin atu tuur hamutuk hodi koa’lia kona-ba fronteira tasi nian sira ho Timor-Leste, prosesu Konsiliasaun Obrigatóriu oferese opsaun ida ne’ebé tulun nasaun rua ne’e bele kumpre sira-nia obrigasaun iha ámbitu KNUDT nian, hodibele avansa ba delimitasaun fronteira tasi nian sira.”

   Ba leten