Timor-Leste hatama Prosesu Konsiliasaun Kompulsoria, Tuir UNCLOS, ba Austrália, kona-ba Fronteiras Marítimas

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 11 fulan-abril tinan 2016

Timor-Leste hatama Prosesu Konsiliasaun Kompulsoria, Tuir UNCLOS, ba Austrália, kona-ba Fronteiras Marítimas

Timor-Leste, ohin hatama prosesu konsiliasaun kompulsoria tuir Nasoens Unidas nia Konvensaun ba Lei Tasi (UNCLOS), ho objetivu atu konklui akordu ida ho Austrália kona-ba fronteiras marítimas permanentes.

Prosesu konsiliasaun ne’e sei kesi Austrália iha prosesu formal ida ne’ebé painel espesialista independente ida mak sei hala’o nudar Komisaun Konsiliasaun.

Enkuantu iha hela aranjus temporariu hodi fahe rekursu sira iha Tasi Timor, oras ne’e dadaun la iha fronteiras marítimas permanentes entre nasaun rua ne’e. Governu Austrália hasees-an husi prosesu obrigatóriu hodi resolve disputa tuir UNCLOS no Tribunal International ba Justisa in 2002, fulan rua molok Timor-Leste restaura nia independênsia, ne’ebé limita Timor-leste nia dalan hodi haforsa nia direitus tuir lei internasional.

Governus Australianus tutuir malu, mos rekuza beibeik ona atu negosia fronteiras marítimas permanentes no tanba ne’e konsiliasaun kompulsoria mak dalan úniku hodi lori Austrália ba meza negosiasaun.

Timor-Leste nia Primeiru-Ministru, Dr. Rui Maria de Araújo hateten, “estabelese Fronnteiras Marítimas permanentes mak kestaun prioridade nasional ba Timor-Leste, hanesan hakat ikus hodi realiza ita-nia soberania hanesan Estadu independente ida.”

Primeiru-Ministru hateten tan, “tuir lei internasional, Austrália obrigadu atu negosia fronteiras marítimas ho Timor-Leste maibé nia rekuza atu negosia, maske ita konvida dala barak ona. Ida ne’e husik hela ita ho opsaun ida ne’e deit.” “Prosesu ida ne’e fó dalan ba Komisaun atu ajuda Nasaun rua ne’e, hodi hetan solusaun amigável ida ba fronteiras marítimas permanentes.”

Nia hateten, “Timor-Leste buka mak solusaun ne’ebé justa no ekitativa no, importante liu, mak ita-nia direitu tuir lei internasional.”

Durante nia vizita foin lalais mai Timor-Leste, Prezidente Indonézia nian, Sua Eselênsia Joko Widodo hamutuk ho Timor-Leste nia Primeiru-Ministru reafirma sira nia kompromisu atu tuur hamutuk, hanesan viziñus no negosia fronteiras marítimas permanentes tuir lei internasional.

 

url: http://timor-leste.gov.tl?lang=tp&p=14978