Governu Timor-Leste

Ministru Justisa partispa iha Semináriu ne’ebé organiza husi Kámara Kontas Timor-Leste nian, hodi haree liu kona-ba “Kontrolu Finansiamentu Públiku”,  ho fatin iha Salaun Nobre Ministériu Negósius Estranjeirus no Kooperasaun, iha Díli, iha sexta-feira liubá, loron 5 fulan fevereiru.

Semináriu ne’e, realizasaun ida hamutuk husi Kámara Kontas Timor-Leste nian no kooperasaun  hosi Uniaun Europeia iha Portugal  ba-iha Institutu Públiku Kamóes ne’ebé iha ne’e, iha ámbitu Programa Justisa nian no nia durasaun loron lima, hahú husi loron 1 to’o loron 5 fulan fevereiru.

Iha ninia diskursu, Ministru Justisa hateten katak, “Kriasaun Kámara Kontas nian iha tinan 2011, marka ona fundamentu importante ba-iha reforma setór públiku. Serve atu hodi konsolida governasaun diak ne’ebé mak konsagra tiha ona iha Planu Estratéjiku Dezenvolvimentu nian ba tinan 2011-2030, ne’e kondisaun ida ne’ebé presiza atu hodi fó konfiansa ba Governu, hanesan rekizitu ba afirmasaun nasionál”.

Atu assegura transparénsia iha administrasaun públika, kapasidade prestasaun kontas ba servisu sira iha instituisaun ida-idak, tenke sai kultura ida ne’ebé iha rigór ba jestaun finansiamentu públiku nian, Ministru Ivo dehan.

Ivo Valente hato’o mós kompromisu Governu nian iha área dezenvolvimentu rekursu umanu sira, auditór no ajente Kámara Konta sira, atu-hodi hetan melloria ida progresiva ne’ebé lori konfiansa boot ba ajente ekonómiku sira, instituisaun privada no públika sira, nasionál no internasionál no sosiedade sivil.

Prezente iha semináriu ida ne’e, mak hanesan, Ministro Estadu Koordenadór Asuntu Administrasaun Estadu no Justisa no Ministru Administrasaun Estatál, Dionísio Babo Soares, Embaixadór Portugal nian, Manuel Gonçalves de Jesus, Embaixadora Delegasaun Uniaun Europeia nian iha Timor-Leste, Sylvie Tabesse, Juíza Konselleira, Maria Natércia Gusmão, membru Parlamentu Nasionál, Governadór Banku Sentrál Timor-Leste, Abraão de Vasconcelos, Komisáriu KAK nian, Adéritu Tilman, Inspetór-Jeral Estadu nian, Francisco Carvalho, membru sira sosiedade sivil, delegasaun sira husi Brasil no Cabo-Verde no instituisaun sira seluk Governu nian.