Toleránsia pontu iha loron 10 fulan-fevereiru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 9 fulan-fevereiru tinan 2016
Komunikadu Imprensa
Toleránsia pontu iha loron 10 fulan-fevereiru tinan 2016
Governu deside fó toleránsia pontu iha loron 10 fulan-fevereiru tinan 2016 ba funsionáriu sira hotu no ajente ministériu sira nian ka servisu sira ne’ebé halo parte, nune’e mós ba institutu no organizmu sira integradu iha administrasaun indireta Estadu nian.
Desizaun ida ne’e, bazeia ba Lei nº 10/2005, loron 10 fulan-agostu, ne’ebé determina loron feriadu nasionál, data ofisiál komemorativa no toleránsia pontu.
Entre data ofisiál komemorativa sira, inklui mós Kuarta-Feira Sinza, ne’ebé iha tinan-tinan iha data variável. Kuarta-Feira Sinza hanesan solenidade ida ne’ebé mós importante iha Komunidade Kristaun: hanesan loron dahuluk koarezma nian iha kalendáriu relijiaun katólika ne’ebé sei hala’o iha loron haatnulu nia laran molok atu tama ba Páskua no, tinan ida ne’e, sei hala’o iha Kuarta-Feira oin mai, loron 10 fulan-fevereiru, tamba ne’e Governu hanoin atu fó toleránsia pontu durante loron tomak.
