Formasaun kona-ba falsifikasaun dokumentu
Investigasaun ba krime sira kona-ba falsifikasaun dokumentu sira, maka tema husi asaun formasaun ne’ebé Polísia Sientífika Investigasaun Kriminál (PSIK) hala’o foin dadaun ne’e. Serimónia entrega sertifikadu hala’o iha loron 22 fulan-janeiru tinan 2016.
Formasaun hala’o durante semana rua no númeru partisipante sira ne’ebé tuir formasaun ne’e barak liu fali formasaun sira uluk nian. Formandu sira ne’ebé tuir formasaun ne’e maizomenus 40 ho serbisu hanesan majistradu, investigadór, auditór Kámara Kontas nian, tékniku Servisu Rejistu no Verifikasaun (SERVE) husi Diresaun Nasionál Terra, Propriedade no Serbisu Kadastrais nian no husi Diresaun Nasionál Rejistu no Notariadu nian sira.
Responsável ne’ebé asegura formasaun ne’e iha nivel tékniku nian, ekipa ne’ebé halo parte husi Inspetór na’in rua, espesialista iha temátika ne’e, sira na’in rua mai hotu husi Polísia Judisiária Portugál nian, entidade ne’ebé rekoñesidu iha nivel internasionál tanba kualidade téknika ne’ebé aas husi ninia ajente sira.
Ida ne’e hanesan formasaun penúltima [daruak sura husi kotuk] husi asaun formasaun téknika maizoumenus sanulu ne’ebé tau ona iha programa ba 2015-2016 nian, ba dezenvolvimentu kapasidade iha área investigasaun kriminál, polísia sientífika no análize laboratoriál, iha Timor-Leste.
Projetu ne’e inklui iha Komponente Justisa husi Programa Apoiu Governasaun Demokrátika Timor-Leste nian, kooperasaun ne’e delega husi Uniaun Europeia iha Portugál iha Institutu Públiku Camões, ne’ebé hahú kedas iha tinan 2012, halo ona parseira ida ho Ministériu Justisa Repúblika Demokrátika Timor-Leste nian no ho entidade lokál sira seluk. Liuhusi parseria ida ne’e maka, Ministériu Justisa nian akompaña ona kriasaun órgaun polísia kriminál nian foun ida ho espesializasaun ne’ebé aas, importante ba dezenvolvimentu nasaun nian.
Polísia Sientífika Investigasaun Kriminál nian, harii iha tinan 2014, iha investigadór na’in 47 no peritu forense na’in 31, sira hotu formadu iha ámbitu Programa ne’e nian, iha estratéjia ida ne’ebé liuhusi formasaun iha Timor-Leste no iha Eskola Polísia Judisíaria nian, iha Portugál.
Serimónia entrega sertifikadu formasaun nian sira kona-ba falsifikasaun dokumentu hala’o iha instalasaun PSIK nian, iha Kaikoli, Dili. Marka prezensa iha serimónia ne’e maka formandu sira no reprezentante husi nivel aas husi institusaun sira ne’ebé envolve, entre sira ne’e mak, Ministru Justisa nian, Prezidente Tribunál Rekursu nian, Embaixadór Portugál nian no Enbaixadora Uniaun Europreia nian.
