Prezidente Indonézia hala’o ninia vizita ofisiál dahuluk ba Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 26 fulan-janeiru tinan 2016

Prezidente Indonézia hala’o ninia vizita ofisiál dahuluk ba Timor-Leste

Prezidente Repúblika Indonézia nian, Joko Widodo, ohin hala’o ninia vizita ofisiál dahuluk ba Repúblika Demokrátika Timor-Leste. Iha parte loro-kraik nian, iha Deklarasaun Konjunta ida ba Imprensa, iha Palásiu Governu, Primeiru-Ministru Timor-Leste nian, Rui Maria de Araújo, hateten katak sorumutuk sira ne’ebé hala’o ne’e pozitiva no produtiva tebes.

Prezidente Indonézia nian to’o iha Dili iha oras tuku 10:00 dadeer, ho Primeira-Dama, Iriana Joko Widodo, no delegasaun ida ne’ebé maka inklui Ministru ba Asuntu Ekonómiku, Ministru Negósiu Estranjeiru, Sekretáriu Governu nian no Ministru Juventude no Desportu. Prezidente no delegasaun Indonézia nian iha serimónia ofisiál boazvindas nian ida, iha Palásiu Prezidensiál, no hala’o sorumutuk ho Xefe Estadu Timor nian, Taur Matan Ruak, nune’e mós ho funsionáriu timoroan nivel aas sira. Liutiha ida ne’e sira  partisipa iha han-meiudia Estadu nian ida.

Iha parte loro-kraik nian, Prezidente Widodo hala’o sorumutuk partikulár ida ho Xefe Governu Timor-Leste nian, molok tama ba-iha sorumutuk biletarál alargadu, ne’ebé partisipa husi Ministru sira Indonezia nian no Ministru Estadu sira husi Governu Konstitusionál VI nian. Durante sorumutuk ne’e, halo tiha ona akordu kooperasaun oin-oin liuhusi Memorandu Entendimentu ne’ebé asina iha área hirak hanesan: Juventude no Desportu, Arkivu sira, Klimatolojia no Jeofízika, Buska no Salvamentu no Enerjia, Mina-rai no Rekursu Minerál sira.

Debate hirak ne’ebé hala’o, iha sorumutuk ho Primeiru-Ministru no mós iha sorumutuk bilaterál, koa’lia liu kona-ba hametin kooperasaun iha área sira hanesan komérsiu, enerjia no dezenvolvimentu infraestrutura nian, nune’e mós kompromisu nasaun rua ne’e nian atu aselera finalizasaun fronteira rai-maran no tasi nian. Prosesu delimitasaun hahú tiha ona, iha vizita ofisiál sira uluk ne’ebé Primeiru-Ministru Rui Maria de Araújo halo ba Indonézia, iha fulan-agostu tinan kotuk.

Molok sai husi Timor-Leste, kalan ne’e, Prezidente Widodo no ninia delegasaun fó omenajen, iha Jardim dos Heróis timorenses [Jardín erói timoroan sira nian], iha Metinaru, no iha Semitériu Seroja, iha Santa Cruz.

Portavós Governu Konstitusionál VI, Ministru Estadu Agio Pereira afirma katak “vizita ohin nian marka relasaun ne’ebé metin entre Timor-Leste no Indonézia. Ita-nia viziñu sai hanesan demokrasia boot ida iha mundu no mosu hanesan poténsia ekonómika ida iha rejiaun ne’e. Ita sei kontinua hadi’a di’ak liután relasaun amizade no kooperasaun nian ne’e, ne’ebé mak ita kria ona iha tinan barak nia laran, bainhira ita buka atu serbí di’ak liu ita-nia povu no serbisu hamutuk ba nasaun rua ne’e nia di’ak.”

   Ba leten