Governu Timor-Leste

PrimeiruMinistru Repúblika Demokrátika Timor-Leste (RDTL), Dr Rui Maria de Araújo simu vizita ofisiál husi Ministru Kordenadór ba Asuntu Polítika, Legál no Seguransa Repúblika Indonézia (RI) ho ninia delegasaun, kuarta-feira (13/01)  iha Palásiu Governu, Dili.

Vizita ida-ne’e nia objetivu hodi reforsa liután relasaun di’ak entre Governu Indonézia no  Governu Timor-Leste.

Iha hasoru malu ida-ne’e, Ministru Panjaitan informa ba Primeiru-Ministru Timor-Leste komprimisiu  husi Governu Indonézia nian atu hahú diskuti delimitasaun  Fronteira ho Timor-Leste iha tinan ida-ne’e.

Iha hasoru malu ida ne’e, nasaun rua hatudu mós sira nia komprimisu polítiku hodi reforsa liután amizade no kria ambiente ba kooperasaun bilaterál iha setór oin-oin, inklui setór Administrasaun Públika no Agikultura.

Aleinde ne’e, Ministru Panjaitan mós informa ba Primeiru-Ministru kona-ba vizita ofisiál Prezidente Repúblika Indonézia nian, Joko Widodo mai Timor-Leste iha tempu badak.

Rui Maria de Araújo simu ho kontenti jestu husi Governu Indonézia nian no hatudu Timor-Leste nia interese hodi esplora liután oportunidade atu aprende husi Indonézia iha área oin-oin,  liuliu kona-ba gestão de barragens hodi responde ba  precipitação atmosférica a nível global.

Iha hasoru malu ida-ne’e, nasaun rua mós fahe esperiénsia  kona-ba dezafiu sira ne’ebé maka Governu enfrenta, liu-liu oinsá atubele atinje  efisiénsia ba jestaun.

Hafoin enkontru ho Primeiru-Ministru, delegasaun Indonezia mós hasoru malu ho Ministru Estadu no Koordenadór balun husi VI Governu Konstitusionál, iha Palásiu Governu.