Selebrasaun Loron Nasionál Juventude Timor-Leste nian ba da-10
Primeiru-Ministru, Rui Maria de Araújo, partisipa iha selebrasaun Loron Nasionál Juventude Timor-Leste nian ba da-10, ne’ebé marka mós data Massacre Santa Cruz 12 Novembru 1991 [Masakre Santa Kruz 12 Novembro 1991], ba da-24, loron kinta-feira ne’e (12/11), iha Dili.
Serimónia sira hahú ho Misa iha Igreja Motael, iha Faról, Díli. Tuir kedasho prosissaun hosi igreja ba semitériu hodi kari ai-funan no hodi hanoin hikas fali ba eventu trájiku masakre juventude Timoroan iha Semitériu Santa Kruz, iha Díli, iha loron 12 fulan-novembru 1991.
Tema ba tinan ida ne’e mak a“Liuhosi komemorasaun ida ne’e ita hahi’i ba ita-nia luta ba libertasaun, hanesan dalan hodi haburas dezenvolvimentu nasionál.”
Primeiru-Ministru tuir misa dadeer nian no hamutuk ho família sira vítima husi masakre 1991. Estudante sira bá tau ai-funan ba joven mártir sira Loriku Asuwa’in, naran ne’ebé dedika ba foin sa’e ne’ebé mak fó sira nian aan tomak ba libertasaun pátria nian.
Iha ninia diskursu iha Semitériu Santa Kruz, Xefe Ezekutivu hatete katak, selebrasaun ba akontesimentu istóriku ne’e , “tenke lori dinámika ida ne’ebé di’ak liu ba sosiedade Timor-Leste no atu promove valór sira ne’ebé maka joven sira husi tinan 1991 hato’o hela mai ita hotu-hotu” nia hatutan tan katak, joven sira ohin loron nian ne’e tenke aprende ho sira husi 12 novembru nian.
“Ita tenke selebra 12 novembru 2015 ho espíritu ida foun, ho dinámika ida foun. Ita tenke husik hela ba kotuk ita-nia laran susar kona-ba ema sira ne’ebé maka fó ona sirania vida. Maibé sakrifisiu hirak ne’ebé sira halo nu’udar orgulhu nasionál ida ba ita hotu, tanba sira saran oan sira nia vida atu rai ida ne’e bele sai independente. Ita la bele tanis bebeik no fó liman ba maluhodi dezenvolve rai ida ne’e ba oin.”,” hatete Primeiru-Ministru.
Iha fatin simbóliku ida ne’e, reprezentante sira husi Juventude sira membru Comunidade dos Países de Língua Portuguesa (CPLP)nian [Komunidade País Lia-Portugés] inklui mós Timor-Leste, iha biban ida ne’e, entrega “Declaração de Dili” ba Governu liuhusi Sekretariu Estadu Juventude Desportu (SEJD) Leovegildo Hornai, konkluzaun sira husi sira nia sorumutuk iha semana liu-bá. Iha Deklarasaun ne’e juventude sira afirma sira nia polítika no vizaun ba dezenvolvimentu juventude hosi nasaun-membru sira CPLP nian iha futuru oin mai.
Tuir mai, Primeiru-Ministru no dignatáriu sira hotu kari aifunan ba-iha rate saudozu Sebastião Gomes ne’ebé ema oho iha tinan 1991, hanesan motivu ba demonstrasaun ne’ebé rezulta Massacre Santa Cruz 12 Novembro 1991 [Masakre Santa Kruz 12 Novembru 1991].
Marka prezensa iha selebrasaun ida ne’e Prezidente Parlamentu Nasionál Vicente Guterres, Prezidente da Asembleia Nasionál Popular de Guiné Bissau nian [Giné Bisau] Cipriano Cassamá, Eis Prezidente Parlamentu Nasionál, Francisco Guterres Lu-Olo, Prezidente ZEESM Mari Alkatiri, Sekretáriu Estadu Juventude no Desportu, Leovigildo Hornai, Komandante F-FDTL Major Jenerál Lere Anan Timor, Komandante Jerál PNTL Komisáriu Júlio da Costa Hornay, Prezidente Juventude husi Angola, Brasil [Brazil], Guinné Bissau [Giné Bisau], São Tomé Príncipe [Saun Tomé no Prínsipe], Portugal [Portugál], Família vítima sira 12 de Novembru 1991 nian, juventude, estudante no komunidade sira.
