Primeiru-Ministru hala’o abertura ba Akampamentu Nasionál Perma-Youth IV iha Aileu
Primeiru-Ministru, Dr. Rui Maria de Araújo, hala’o abertura ofisiál ba Akampamentu Nasionál Perma-Youth ba dala haat, no lansamentu ofisiál mós ba Programa Nasionál To’os Eskolár no Manuál Ensinu Báziku, “to’os permakultura ba labarik, Segunda-Feira horiseik (9/11) iha aldeia, Fatisia, suku Buklelo, postu administrativu Laulara, munisípiu Aileu.
Akapamentu Nasionál ba dala uluk hala’o iha tinan 2008 iha Tasi-Tolu, Dili; daruak iha tinan 2011 iha Remexiu, Aileu; datoluk iha tinan 2012 iha Laga-Baukau no iha tinan ida ne’e ba dala haat iha Fatisia, Laulara, Aileu, partisipa husi reprezentante Juventude husi Munisípiu 13.
Xefé Governu fó parabens ba Komisaun organizadora ne’ebé bele dinamiza no organiza Akampamentu Nasionál ida ne’e. Xefé Governu enkoraza mós juventude sira atu durante iha akampamentu bele aprende kuda modo, tanba kuda modo fó oportunidade ne’ebé di’ak ba juventude sira. Aproveita biban ida ne’e, Primeiru-Ministru fó apelu ba joven sira, autoridade lokál, no ba parseiru dezenvolvimentu sira ne’ebé fó apoiu ba inisiativa ida ne’e atu kontinua hala’o movimentu hodi lori joven sira fila ba agrikultura.
Akampamentu hahú husi loron 9 to’o loron 13 fulan-novembru tinan 2015. Atividade hirak ne’ebé partisipante sira hala’o iha semana ida nia laran mak hanesan; promove meiu-ambiente no sensibilizasaun ba mundansa klimátika, fahe esperiénsia kona ba rai, agrobiodiversidade no to’os eskola.
Partisipa iha eventu ida ne’e mak reprezentante husi Ministériu Agrikultura, Ministériu Edukasaun, SEPFOPE, Ajénsia Internasionál sira, Komandante PNTL munisípiu Aileu, Juventude, Lider Komunitáriu no populasaun sira.
