Ministru Negósius Estranjeirus no Kooperasaun, Hernâni Coelho, prezide sorumutuk Ministeriál Komunidade Nasaun Lian Portugés (CPLP), iha Nova Iorke.

Ministru Negósius Estranjeirus sira husi nasaun sira ne’ebé tama iha CPLP, hamutuk ho sira-nia Reprezentante Permanente iha Organizasaun Nasoins Unidas no ho Sekretáriu Ezekutivu CPLP nian, Embaixadór Murade Murargy, partisipa iha sorumutuk ne’ebé mak organiza husi Misaun Permanente Timor-Leste nian, iha sede ONU nian, iha loron 30 fulan-setembru.

Introdusaun husi Ministru Hernâni Coelho no Sekretáriu Ezekutivu Murade Murargy hotu tiha, iha mós aprezentasaun ida kona-ba situasaun iha Gine-Bisau husi Reprezentante Espesiál CPLP nian. Estadu-Membru sira mós diskute kona-ba situasaun agora daudaun nian, no apoia atu halo lalais serbisu formasaun Governu nian. Propoin mós vizita delegasaun CPLP nian ida hafoin halo tiha tomada pose ba governu foun.

Tuir fali mai, Saun Tomé no Prínsipe informa ba partisipante sira kona-ba konferénsia internasionál ida ne’ebé mak sei hala’o semana hirak oin mai iha Londres. Konferénsia ne’e sei halibur hamutuk investidór no parseiru sira ba apoiu bilaterál no multilaterál nian, atu diskute finansiamentu ba dezenvolvimentu.

Grupu ne’e mós diskute kona-ba tema sira seluk ne’ebé mak trata iha Sorumutuk Estraordináriu Konsellu Ministrus nian, iha fulan-marsu tinan 2016, iha Lisboa no iha Simeira Xefe Estadu sira no Governu nian iha fulan-juñu tinan 2016, iha Brazíl.

Hernâni Coelho taka sorumutuk ne’e no, tuir fali mai, nia ko’alia ba órgaun komunikasaun sosiál nian sira.

Iha kuadru Nasoins Unidas no maske iha ajenda ida ne’ebé nakonu, Ministru Negósius Estranjeirus no Kooperasaun marka prezensa iha kuaze sorumutuk no eventu sira hotu, hodi fó oportunidade ba kontaktu ho ninia omólogu sira no atu hadi’a relasaun bilaterál sira Timor-Leste ninian.