Komisaun Konsultivu hala’o sorumutu atu analiza fronteira marítimu

Kin. 10 setembru 2015, 22:24h
IMG_6249

Komisaun Konsultivu Konsellu nian ba Delimitasaun Definitivu Fronteira Marítimu hala’o sorumutu iha loron 9 fulan-setembru, iha Díli, hodi analiza kestaun kona-ba negosiasaun ba fronteira marítimu nian sira entre Timor-Leste ho Indonezia, ne’ebé foin lalais ne’e hatudu progresu relasiona ho Komisaun ne’e nia pozisaun kona-ba matéria ida ne’e.

Prezidente Joko Widodo no Primeiru-Ministru Rui Maria de Araújo fó-sai, iha fulan-agostu, katak Timor-Leste no Indonézia hakarak rezolve lalais sira nia fronteira terretre ho marítimu.

Prezidente Indonézia nian konsidera katak delimitasaun fronteira marítimu la kleur tan sei bele rezolve ona, no nia esplika katak “ ita sei hahú hosi zona norte no kontinua mai zona sul”. Rui Maria de Araújo fó-hatene katak Governu Timor-Leste “prontu ona atu hahú negosiasun kona-ba delimitasaun fronteira marítimu ho Indonézia, tuir konvensaun Nasoens Unidas nian kona-ba Direitu ba Tasi (KNUDT), tinan 1982”.

Etapa tuir mai hosi prosesu negosiasaun nian ho Indonézia maka sorumutuk Komisaun nian ba Froteira Komun sira, ne’ebé sei hala’o iha tinan ida ne’e. Hato’o mós proposta ida atu hala’o sorumutuk paralelu ida hodi hahú ona harii kuadru negosiasaun nian ida kona-ba fronteira marítimu entre país rua ne’e.

Konsultór jurídiku Timor-Leste nian, Profesór Vaughan Lowe, partisipa mós iha sorumutuk Komisaun Konsultivu nian ne’e iha loron 9 fulan-setembru, hodi fó ninia hanoin relasiona ho kestaun hirak ne’ebé mak analiza tiha ona ne’e. Profesór Vaughan Lowe nu’udar espesialista ida koñesidu iha mundu iha direitu internasionál kona-ba fronteira marítimu sira, Direitu Tasi nian no rezolusaun konflitu internasionál nian sira.

Iha ninia deslokasaun mai Dili, Profesór ne’e hato’o mós, ninia palestra ida kona-ba “Direitu Internasionál Tasi nian: Vizaun Jerál ida”, iha Universidade  Nasionál  Timor Lorosa’e (UNTL).

   Ba leten