Timor-Leste partisipa iha eventu internasionál sira kona-ba delimitasaun fronteira marítima sira nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 26 fulan-agostu tinan 2015
Timor-Leste partisipa iha eventu internasionál sira kona-ba delimitasaun fronteira marítima sira nian
Funsionáriu sira nível aas nian maka sei reprezenta Governu Timor-Leste iha eventu internasionál rua kona-ba delimitasaun fronteira marítima sira nian, ne’ebé sei hala’o iha Bali, Indonézia, iha loron 26 to’o loron 29 fulan-agostu.
Reprezentante sira nasaun nian mak Embaixadór sira iha Austrália, Abel Guterres, no iha Reinu Unidu Joaquim da Fonseca - ne’ebé mós nu’udar negosiadór-xefe Konsellu Nasionál ba Delimitasaun Definitiva Fronteira Marítima sira nian ho Austrália -, Diretora ezekutiva hosi Gabinete Fronteira Marítima sira nian, Elizabeth Exposto, no Diretór ba Asuntu Jurídiku Ministériu Negósiu Estranjeiru no Kooperasaun, Francisco Ornai. Ida ne’e hanesan biban ida ne’ebé di’ak tebes ba Timor-Leste hodi fó sai ba partisipante internasionál sira kona-ba nia pozisaun iha matéria ne’e no ba debate hodi buka dalan ba rezolusaun problema hirak ne’ebé maka Timor-Leste hasoru tiha ona.
Eventu dahuluk maka Semináriu Internasionál kona-ba Delimitasaun Marítima, organiza husi Institutu Marítimu Koreanu, ne’ebé mak sei hala’o iha loron 26 fulan-agostu. Tuir fali iha, loron 27 no loron 28 fulan-agostu, sesaun traballu nian ida ne’ebé organiza husi Tribunál Internasionál Direitu Tasi nian (TIDM-sigla iha lian portugés) kolabora ho Ministériu Negósiu Estranjeiru Repúblika Indonézia nian. Sesaun traballu nian sei halo análize ba Konvensaun Nasoins Unidas nian tinan 1982 kona-ba Direitu Tasi nian, ho atensaun espesiál ba knaar TIDM nian. Delegadu sira Timor-Leste nian sei debate prosesu aprezentasaun kazu sira ne’e iha Tribunál, estuda kazu sira kona-ba aplikasaun lei nian, analiza prosesu sira iha kursu no aplikasaun ba medida provizória hirak ne’ebé prevee iha Konvensaun Nasoins Unidas nian.
Porta-Vós Governu nian, Ministru Estadu Agio Pereira, observa tiha katak “ hanesan Timor-Leste buka atu rezolve limite marítimu ho viziñu sira, mak ita haree ba direitu internasionál nu’udar baze ba rezultadu ida ne’ebé maka justu. Ita fó valór ba ita-nia funsionáriu sira nia partisipasaun iha eventu rua ne’e, tanba sira trata kona-ba problema sira ita-nia nasaun nian iha área ida ne’e no serve mós ba estuda esperiénsia no koñesimentu ema seluk nian”.
