Primeiru-Ministru no Prezidente Autoridade RAEOA dirije Sorumutuk Dahuluk Komisaun Koordenasaun no Akompañamentu
Primeiru-Ministru, Dr. Rui Maria de Araújo, hamutuk ho Prezidente Autoridade RAEOA - Rejiaun Administrativa Espesiál Oekuse Ambeno, Dr. Mari Alkatiri dirije Sorumutuk Dahuluk Komisaun Koordenasaun no Akompañamentu Governo Sentrál ba RAEOA, iha Salaun Madre Dominicana, iha Oekuse.
Hafoin Governu Sentrál transfare podér sira ba RAEOA, harii kedas mós komisaun koordenasaun no akompañamentu ne’ebé kompostu husi Membru Governu ne’ebé iha funsaun relevante ho asuntu ne’ebé relasiona ho Administrasaun Rejiaun Administrativa Espesiál nian.
“Ha’u agradese ba membru hotu-hotu nia kontribuisaun iha sorumutuk ida ne’e no hein katak parte ministériu tékniku sira mós komesa ajusta an ba iha maneira foun kona-ba relasionamentu entre Rejiaun Administrativa Espesiál ho Governu Sentrál nia funsaun sira,” hatete Primeiru-Ministru.
Sorumutuk ne’e konta ho partisipasaun husi Ministru Planeamentu no Investimentu Estratéjiku, Kay Rala Xanana Gusmão, Ministru tékniku sira, Sekretáriu Rejionál sira, Diretór-Jerál no mós Nasionál sira.
Sorumutuk ba dala uluk ida ne’e foka liu kona-ba evolusaun husi implementasaun Rejiaun Administrativu Espesiál ninian no kestaun balun kona-ba koordenasaun entre ministériu tékniku sira ho Governu Sentrál nian ho RAEOA.
Asuntu ida ne’ebe aborda iha enkontru ne’e mak nesesidade atu Governu Sentrál aprova rezolusaun balun atu hametin liután prosesu koordenasaun entre instituisaun Estadu nian hodi suporta dezenvolvimentu rejiaun administrativa espesiál nian no mós atu hare’e ba enkuadramentu legál ba RAEOA ne’ebe seidauk kompletu.
“Hau hakarak felisita esforsu nebe Sr. Prezidente no Sekretariu RAEAO sira hala’o, liuliu kona-ba kestaun implementasaun fízika kona-ba oinsá implementa ideia boot ho hanoin ida katak modelu Governasaun ida ne’e bele sai hanesan pilotu ne’ebe bele espande ba territoriu Timor-Leste laran tomak. Hein katak modelu ne’e bele halo lalais liután prosesu dezenvolvimentu iha ita nia rain,” hatete tan Primeiru-Ministru.
Tuir planu, Komisaun Koordenasaun no Akompañamentu sei hala’o tan sorumutuk ida molok realiza selebrasaun tinan 500 portugés sira tama iha Illa Timor ne’ebe sei hala’o iha rejiaun espesiál iha fulan-novembru 2015.
Sorumutuk ne’e liutiha Primeiru-Ministru, Dr. Rui Araújo, hamutuk ho Prezidente RAEOA Mari Alkatiri halo lansamentu primeira pedra ba instalasaun bee mós ba iha Rejiaun Espesial ne’ebé hetan suporta husi Asian Development Bank-ADB.
