Sorumutuk Konsellu Ministrus nian iha loron 21 fulan-jullu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 21 fulan-jullu tinan 2015
Komunikadu Imprensa
Sorumutuk Konsellu Ministrus nian iha loron 21 fulan-jullu tinan 2015
Konsellu Ministrus hala’o sorumutuk iha tersa ne’e, loron 21 fulan-jullu tinan 2015, iha sala sorumutuk Konsellu Ministrus, iha Palásiu Governu, iha Dili no aprova ona:
1. Rezolusaun Governu nian ne’ebé rekoñese Eskutizmu no Uniaun Nasionál Eskuteiru sira Timor-Leste nian
Liuhusi diploma ida ne’e, Governu rekoñese utilidade públika husu Eskutizmu no Uniaun Nasionál Eskuteiru sira Timor-Leste nian (UNE-TL).
Atividade eskutizmu nian eziste kedas ona iha Timor-Leste dezde tinan 1972. Ida ne’e hanesan organizasaun apolítika no naun-governamentál, ne’ebé destina ba formasaun integrál foin-sa’e sira nian, ne’ebé bazeia ba ninia membru sira-nia sentidu voluntáriu nian. Movimentu ida ne’e, ne’ebé bazeia ba metodolojia no prinsípiu sira Baden Powell nian, kompleta funsaun família, eskola no relijiaun nian no dezenvolve karaktér foin-sa’e sira nian, hodi forma sira-nia personalidade no espíritu sidadania no partisipasaun nian iha konstrusaun komunidade.
2. Proposta Lei kona-ba Suku sira
Iha tempu ne’ebé Estadu prepara hela atu estabelese Podér Lokál, Konsellu Ministrus aprova ona Proposta Lei kona-ba Suku sira, ne’ebé iha tempu badak sei aprezenta ba Parlamentu Nasionál atubele hetan aprovasaun. Proposta ida ne’e define natureza Suku sira nian, tuir orientasaun sira husi Tribunál Rekursu, klarifika kuadru atribuisaun no kompeténsia sira nian, introdús alterasaun sira iha prosesu eleisaun dirijente komunitáriu sira nian no estabelese regra sira atu garante transparénsia, izensaun no responsabilidade ne’ebé boot liután husi sira-nia parte ba membru sira husi sira-nia komunidade.
Alterasaun sira ba kuadru jurídiku Suku sira nian ne’e buka atu valoriza no reforsa ninia autoridade, define ninia papél ba intituisaun Estadu nian sira no órgaun sira Podér Lokál nian sira, no evita konflitu pozituvu sira kona-ba kompeténsia sira husi organizasaun komunitária sira nian ho Autoridade Rejiaun Administrativa Espesiál Oekusi Ambenu no ho Munisípiu sira.
3. Alterasaun dalimak ba Dekretu Governu n.u 2/2007, loron 1 fulan-agostu, ne’ebé regulamenta titulár órgaun soberania nian sira ninia estatutu
Diploma ne’e aumenta tan artigu ida ba Dekretu Governu n.u 2/2007, loron 1 fulan-agostu, ne’ebé garante ba membru Governu sira, durante hala’o ninia mandatu, direitu atu hala’o ezame médiku kona-ba kontrolu saúde periódiku iha estranjeiru, to’o harii sistema seguransa sosiál nian no kondisaun hirak ne’ebé adekuada iha ospitál sira husi Servisu Nasionál Saúde nian.
4. Dekretu-Lei ne’ebé estabelese Orgánika Ministériu Finansas nian
Ministériu Finansas, tuir Orgánika Governu Konstitusionál VI nian, “mak orgaun sentrál Governu nian ne’ebé sai hanesan responsavel ba konsepsaun, ezekusaun, koordenasaun no avaliasaun kona-ba polítika ne’ebé Konsellu Ministrus define no aprova ona ba área sira hanesan monitorizasaun anuál orsamentu nian no finansas nian”.
Orgánika ida ne’e define estrututra Ministériu Finansas nian ho objetivu atu kontribui ba jestaun ida ne’ebé efikás liután kona-ba finansa públika sira, ne’ebé hatúr iha sistema tratamentu dadus nian sira no prestasaun konta nian hirak ne’ebé transparente. Tuir liña hirak ne’ebé Planu Estratéjiku Dezenvolvimentu no Planu Estratéjiku Ministériu Finansas nian determina, enkuadra loloos duni tuir nesesidade ekonómika no sosiál nasaun nian.
Estrutura ida ne’e reflete mós opsaun lejizlativa agora nian iha matéria finansiamentu nian, liuliu kriasaun parseira públiko-privada sira no rejime dívida públika nian, nune’e mós ho reforma hirak ne’ebé dadaun ne’e halo hela, hodi kria servisu hirak ne’ebé adekuadu ba ninia akompañamentu.
5. Rezolusaun Governu nian kona-ba investimentu iha prospesaun no peskiza iha Timor-Leste
Haree ba nesesidade atu hakle’an koñesimentu kona-ba territóriu nasionál ne’ebé liga ba potensiál rekursu minerál nasaun nian sira, Konsellu Ministrus deside tau orsamentu ba tinan tolu oinmai ne’e, kuantidade hamutuk dolar amerikanu millaun lima-nulu, ho hanoin atubele realiza estudu jeolójiku no jeofíziku nian hirak ne’ebé mak permite avaliasaun kona-ba potensiál nasionál nian iha idrokarbonetu no minerál sira.
6. Dekretu-Lei ne’ebé mak define rejime nomeasaun no kolokasaun ofisiál ligasaun Ministériu Interiór nian sira, no mós rejime kona-ba partisipasaun husi forsa no servisu seguransa nian sira no ajente Protesaun Sivíl nian sira iha misaun internasionál sira
Dekretu-Lei ida ne’e estabelese, iha diploma legál ida, rejime rua kona-ba atividade ba funsionáriu sira Ministériu Interiór nian iha organizmu ka iha misaun internasionál sira nian.
Rejime ida husi rejime rua ne’e enkuadra funsaun husi ofisiál ligasaun nian sira husi Ministériu Interiór (maihusi Polisia Nasionál Timor Leste nian no maihusi Servisu Migrasaun nian) no regula sira-nia nomesaun no kolokasaun iha organizmu internasionál sira no iha embaixada sira, misaun diplomátika no konsuladu Timor-Leste nian sira.
Rejime ida seluk ko’alia kona-ba partisipasaun Forsa no Servisu Seguransa nian no ajente Protesaun Sivíl nian sira husi Ministériu Interiór iha misaun internasionál sira ne’ebé rezulta husi kompromisu internasionál sira Estadu Timor nian. Ida ne’e inklui mós misaun umanitária nian, apoiu ba pás no jestaun sivíl krize sira nian, nune’e mós ho asaun kooperasaun polisiál no protesaun sivíl nian sira, ne’ebé asumida iha kuadru inisiativa bilaterál no multilaterál kona-ba kooperasaun no seguransa no akordu internasionál sira seluk ne’ebé Timor-Leste halo.
