Governu Timor-Leste

Primeiru-Ministru, Dr. Rui Maria de Araújo, iha sesta ne’e (17/07) taka Forum Sosiedade Sivíl Nasaun CPLP (Comunidade dos Países de Língua Portuguesa) Daruak, iha Salaun Nobre, Ministériu Negósiu Estranjeiru no Kooperasaun, iha Dili.

Tema ba forum daruak ne'e mak “O valor económico da Identidade Comum da Sociedade Civil da CPLP” no marka prezensa iha forum ne’e reprezentante sira husi Sosiedade Sivíl, husi Organizasaun Relijioza no Organizasaun Naun Governamental CPLP nian sira.

Iha nia alokusaun, Primeiru-Ministru hato'o parabéns ba nasaun CPLP nian sira ne’ebé konsegue realiza duni Forum Sosiedade Sivíl CPLP Daruak ne’e iha Dili, Timor-Leste. "Ita-nia nasaun ida-idak, no sidadaun hotu-hotu, organizasaun Sosiedade Sivíl no konfisaun relijioza sira, livre no apartidária, tenki bolu atu servisu hamutuk no parseria ho Governu", hatete Primeiru-Ministru.

Xefe Governu hatete mós katak demokrasia nia vitalidade bele hetan mós liuhusi partisipasaun organizasaun sira Sosiedade Sivíl nian no liuhusi promosaun sosiedade plurál, ho partisipasaun, inkluziva no ho maturidade.

"Tanba iha sosiedade sivíl ho dinámika no ho diversidade mak sinál maturidade demokrasia ida nian, no nu’udar valór mós tanba kontribui ba klarifikasaun ideia ne’ebé dudu nasaun sira ba avansu."

Primeiru-Ministru salienta mós ba reprezentante nasaun sira husi CPLP katak liuhusi lingua-komum portugés, bele mós Sosiedade Sivil hametin liután demokrasia iha komunidade ne’e nia laran.

Iha Forum Sosiedade Sivil CPLP daruak ne'e nian aprova mós estatutu ne’ebé, tuir Primeiru-Ministru, reprezenta hakat importante tebes ba fortalesimentu forum ne'e nian.

Primeiru-Ministru agradese ba kontribuisaun no partisipasaun husi reprezentante sira Sosiedade Sivil CPLP nian iha serbisu ne’ebé dezenvolvidu durante Forum Sosiedade Sivíl Daruak ne'e no dezeja viajen regresu nian ne’ebé di’ak ba partisipante sira hotu.