Governu Timor-Leste

Ró kruzeiru Pacific Jewel sei to’o iha Dili iha sábadu ida ne’e, loron 13 fulan juñu, ho turista maizoumenus rihun 2000 husi nasaun oioin, barak liu husi Austrália, ba vizita ida iha oras ualu nia laran.

Durante iha Timor-Leste, sira sei vizita ba fatin turístiku sira iha Dili no mós fatin balun iha Munisípiu Ermera no Likisá.

Iha Ermera, turista sira sei vizita instalasaun kooperativa Kafé Timor nian iha Railaku no Glenu, no iha fali Munisípiu Likisá sira sei vizita merkadu ki’ik artezanatu nian iha Maubara no komarka antigu iha Aipelu ne’ebé aat ona.

Iha Dili, tuir ajenda, sira sei halo vizita ida ba iha tasi-ibun Areia Branca (Rai Henek Mutin) no ba monumentu Kristu-Rei, ba Largu Lesidere, estátua João Paulo II iha Tasi Tolu, ba Palásiu Nobre, ba Salaun Leitura Xanana, ba instalasaun Arkivu Nasionál nian no ba Dare.

Vizita ida ne’e ninia objetivu prinsipál maka atu fó koñese fatin turístiku ne’ebé mak relasiona ho istória, kultura no produtu Timor-Leste nian.

Ministériu Turizmu, Arte no Kultura maka instituisaun ne’ebé mak sai hanesan responsavel atu orienta vizita ne’e, sei uza ema na’in 149, entre estudante sira husi universidade sira iha Dili laran no sira seluk ne’ebé iha koñesimentu lian nian, liuliu iha lian inglés, no mós husi área Relasaun Públika.

Tuir ajenda, ró kruzeiru ne’e sei atraka iha portu Dili nian iha oras tuku 8 dadeer. Ministériu Turizmu, Arte no Kultura hamutuk ho Ajénsia Viajen Dive,Trek & Camp Timor-Leste, sei aranja kareta hodi tula turista sira ba fatin vizita nian sira ne’ebé tau tiha ona iha ajenda.

”Ba nasaun joven ida ne’e, hau hanoin vizita ida ne’e sei sai hanesan oportunidade di’ak ida hodi promove Timor-Leste, liuliu ninia potensiál turizmu nian, produtu artezanatu nian sira no kultura nasaun nian”, Ministru Turismu, Arte no Kultura, Francisco Kalbuadi Lay, haktuir.