Sorumutuk anuál tinan 2015 entre Governu ho parseiru dezenvolvimentu Timor-Leste nian sira ne’ebé dedika ba konsolidasaun instituisaun sira
Sorumutuk Parseiru Dezenvolvimentu Timor-Leste nian sira hala’o, ohin, loron 6 fulan-juñu, iha Sentru Konvensaun Dili. Governu organiza sorumutuk anuál ida ne’e ho parseiru dezenvolvimentu nian sira, atu fahe ninia vizaun ba futuru, ko’alia kona-ba prioridade sira ba prazu médiu no halo reflesaun kona-ba progresu hirak ne’ebé alkansa ona iha dezenvolvimentu nasionál.
Tinan ida ne’e, tema sorumutuk nian maka “Konsolidasaun Instituisaun sira no Tranzisaun ba ninia Reziliénsia”.
Primeiru-Ministru, Rui Maria de Araújo, hato’o nia boazvindas ba partisipante sira no agradese ba respeitu boot ne’ebé hotu-hotu hatudu iha tempu ida ne’ebé Timor-Leste lakon nia eroi nasionál Fernando La Sama de Araújo. Tuirmai, xefe ezekutivu nian ko’alia kona-ba susesu no dezafiu kontínuu Timor-Leste nian, no aprezenta planu Governu nian atu hasoru dezafiu hirak ne’e.
Iha sorumutuk ne’e, aprezentasaun no painél diskusaun nian sira hatudu, iha detalle, asaun espesífika hirak ne’ebé Governu planeia atu hala’o iha tinan rua hobalun oin mai, liuliu, liuhusi ninia programa reforma nian sira. Ida ne’e inklui reforma ba Administrasaun Públika, reforma fiskál no tributária no armonizasaun no uniformizasaun lei sira.
Partisipante sira husi rai-li’ur, parseiru dezenvolvimentu nian sira, membru sira husi sosiedade sivíl no reprezentante sira husi setór privadu, hotu-hotu hetan biban atu partisipa iha debate sira iha sorumutukk 2015 ne’e nian ho parseiru dezenvolvimentu Timor-Leste nian sira.
