Loron 100 Governu Konstitusionál VI nian Serbisu ho Rigór no Responsabilidade

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 28 fulan-maiu tinan 2015

Loron 100 Governu Konstitusionál VI nian

Serbisu ho Rigór no Responsabilidade

Iha tersa ne’e, loron 26 fulan-maiu, Governu Konstitusionál VI marka loron ukun nian ba da-100. Loron 100 ne’ebé karaterizadu ona ho ezekutivu ida ne’ebé forte, ne’ebé motivadu husi kompromisu ne’ebé forte atu halo asaun. Primeiru-Ministru, Dr. Rui Maria de Araújo, deklara katak “Governu ne’e hala’o nafatin serbisu ho rigór no responsabilidade.”

Iha períodu badak ida ne’e nia laran, Governu fó ona ekipamentu ba eskola sira no kontinua fó formasaun ba profesór rihun ba rihun kona-ba kurríkulu eskolár foun. Kuidadu saúde primáriu sira hahú implementa ona iha sentru no postu saúde nian sira hotu, ho atensaun espesiál ba-iha área Saúde Familiár nian.

Atu hadi’a sidadaun sira-nia asesu ba servisu báziku sira ne’ebé importante, maka halo dadaun estrada no ponte sira ho kualidade di’ak no kontinua dadaun iha melloria iha distribuisaun públika eletrisidade nian, no asesu  ba bee moos no saneamentu báziku. Governu hahú investe liután iha setór agríkola, atu Timor-Leste bele hetan autonomia alimentár no hasa’e tan rendimentu no loke serbisu iha zona rurál sira. Hahú ona projetu irrigasaun nian foun sira, no loke tan ona sentru formasaun agríkola nian no disponibiliza ona mós rekursu prátika agríkola nian sira.

Aleinde preparasaun Estrutura Orgánika foun Governu nian, Programa Governu Konstitusionál VI no Orsamentu Retifikativu ba tinan 2015, Governu halo ona reforma iha sistema finanseiru, lejizlativu no administrativu. Reforma sira ne’e atu garante ezekusaun orsamentu ida ne’ebé ho kualidade di’ak liutan, no fó atensaun liu-liu ba planeamentu, orsamentasaun, ezekusaun no akompañamentu no avaliasaun kona-ba despeza sira.

Tanba responsabilizasaun sai henesan prioridade ne’ebé boot, mak iha loron 4 fulan-juñu, sei publika relatóriu ida kona-ba atividade sira ne’ebé mak Governu Konstitusionál VI hala’o ona iha ninia mandatu loron 100 dahuluk.

Portavós Governu Konstitusionál VI nian, Ministru Estadu Agio Pereira hateten katak “loron 100 dahuluk ne’e nu’udar períodu ida ho asaun ne’ebé mak notável tebes. Ida ne’e hanesan inísiu ida de’it husi buat ne’ebé Governu hakarak alkansa iha ninia mandatu tinan rua hobalu nia laran ne’e, tanba kontinua envolve komunidade no servisu hamutuk ho rigór no responsabilidade hodi serbí povu Timor-Leste nian”.

   Ba leten