Governu Timor-Leste

Ministériu Administrasaun Estatál asina ona akordu kooperasaun nian ida, iha loron 18 fulan-maiu, ho Munisípiu portugés Penafiel nian, durante Konferénsia Internasionál Desentralizasaun no Podér lokál nian ba da-IV.

Asina ona hosi Vise-Ministru Administrasaun Estatál, Tomás do Rosário Cabral no hosi Prezidente Kámara Munisipál Penafiel nian, Antonino Aurélio Vieira de Sousa Moreira Akordu ho munisípiu portugés, ho ninia objetivu hodi dezenvolve no reforsa relasaun amizade no kooperasaun nian entre populasaun sira munisípiu Penafiel no Lautein nian.

Kooperasaun entre Munisípiu rua ne’e inklui área ekonómika, kulturál, sosiál no edukativa, nune’e mós hodi prevee dezenvolvimentu programa estájiu no fornesimentu meiu tékniku nian sira no materiál hirak ne’ebé adekuadu ba projetu sira.

Kámara Munisipál Penafiel sei hamutuk ho Minisípiu Portugés rua tan, Grándola no Lagoa, ne’ebé mak iha fulan-marsu tinan 2013 asina ona akordu kooperasaun nian ida ho Munisípiu Timor nian. Iha ámbitu Konferénsia Internasionál Desentralizasaun no Poder Lokál ba da-IV nian, ne’ebé hala’o ona iha fulan ida ne’e, munisípiu tolu ne’e (Grándola, Lagoa no Penafiel) sira mós iha biban hodi bá to’o iha ponta leste illa nian, iha ne’ebá administrasaun no ninia funsionáriu sira simu sira no aleinde ne’e sira mós ba vizita Eskola Referénsia Lautein no fatin potensiál turístiku nian.

Iha tinan ida ne’e, no durante fulan ida nia laran, Munisípiu Lagoa haruka tékniku na’in rua hodi kapasita rekursu umanu sira hamutuk ho administrasaun Lautein nian iha área sira informátika no administrasaun lokál nian (protokolu, protesaun sivíl, planeamentu atividade sira nian no orsamentu). Munisípiu sira ne’e remata ona sira nia kampaña rekolla livru sira, atuhodi kria biblioteka minisipál Lautein nian.

Ho asinatura akordu foun rua ne’e nian, munisípiu tolu ne’e sei haka’as an hamutuk hodi hasa’e rekursu sira no kooperasaun ba dezenvolvimentu Lautein nian.