Governu Timor-Leste

Primeiru-Ministru Dr. Rui Maria de Araújo, hasoru malu ho Embaixadór RepúblikaKorea, Kim Ki-nam iha kinta-feira (26/3), iha Palásiu Governu, Dili.

Iha sorumutu ne’e Primeiru-Ministru Dr. Araújo, no Embaixadór Ki-nam, ko’alia kona-ba mudansa foun ba iha Governu Konstitusionál Daneennian no mos kona-ba relasaun bi-laterál entre nasaun Timor-Leste ho Korea.

Primeiru-Ministru Dr. Araújo, apresia ba suporta ne’ebé nasaun Korea fo ba Timor-Leste dezde independénsia, liu-liu iha área dezenvolvimentu rekursus umanus, saúde, obras públikas no edukasaun.

Primeiru-Ministru hatutan katak suporta hosi Governu Korea ba traballadór-konvidadu sira besik 1,400 ne’ebé hetan tiha ona oportunidade atu aprende abilidade foun liu hosi servisu iha industria oin-oin; no mos ba bolseiru sira Timor oan ne’ebé tuir estudus iha nasaun refere.

Embaixadór Ki-nam, hateten katak nasaun Korea hanesan nasaun avansadu iha setór industria iha Azia, no sei kontinua halo progressu ba koperasaun bilaterál ho Timor-Leste liu-liu iha área edukasaun no saúde nian.

Embaixadór haktuir tan katak, apoiu ne’ebé Korea bele fo ona liu hosi Ajensia Internasionál Koperasaun Korea nian KOIKA inklui impressora bo’ot foun ne’ebé uza hela daudaun hosi Ministeriu Edukasaun; apoiu ba eskola sekundária téknika ne’en (6); no treinamentu iha área seguransa ba Unidade Patrullamentu Marítima (UPM), Policia Nasionál Timor-Leste nian.Tuir planu ne’ebé iha ona, Embaixador Ki-nam hateten tan katak Governu Korea sei suporta mos Governu Timor-Leste atu harii Sentru Nasional ba Peskas nian.

Primeiru-Ministru Dr. Rui Maria de Araújo, iha biban hanesan ko’alia kona-ba possibilidade Korea atu kopera ho Timor-Leste hodi estabelese abilidade ba iha manutensaun no reparasaun ba ro iha rai-laran. Korea nasaun ida koñesidu kona-ba abilidade teknika a’as iha área ne’e no Timor-Leste oras ne’e sei hala’o manutensaun ba ro iha nasaun estranjeiru no wainhira manutensaun ba ro bele hala’o ona iha rai-laran sei fo vantazen oin-oin ba Timor-Leste iha futuru.