Governu Timor-Leste

Ministru Estadu Koordenadór Asuntu Ekonómiku  no Ministru Agrikultura no Peska,  Estanislau da Silva hamutuk ho Ministru Komérsiu Indústria no Ambiente (MKIA), António da Conceição iha loron 1 fulan-maiu 2015 halo kolleita ikan salomaun no kadiuk iha  bairru Manemori, Suku Ulmera, Postu Administrativu Bazartete, Munisípiu Likisá.

Kolan ikan ho nia luan hektar 1 ida resin ne’e,  prepara husi grupu Tasi Oan La’o Hamutuk. Ministru Estadu Koordenadór Asuntu Ekonómiku no Ministru Agrikultura no Peska, Estanislao da Silva promete sei koordena ho Ministériu Komérsiu Indústria no Ambiente, atu buka merkadu no fó apoiu orsamentu.

“MKIA mak sei organiza didi’ak atu garante produsaun ikan no kadiuk hodi bele hetan  merkadu, aleinde distribui ikan sira-ne’e ba restaurante, F-FDTL, PNTL no programa merenda eskolár,” Ministru haktuir.

Ministru mós informa, MKIA liuhusi  IADE  mak sei fó  kapasitasaun ba grupu Tasi Oan La’o Hamutuk  no grupu seluk ne’ebé haki’ak ikan ka kadiuk.

Prezidente Asosiasaun Grupu Tasi Oan La’o Hamutuk, Mateus Soares husu, apoiu husi Ministériu Agrikultura no Peskas atu dezenvolve produsaun ikan no kadiuk. “Ami presiza eskavator atu haluan lagoa ne’e liu hektar ida atu prepara ikan no kadiuk barakliu-tán ba konsumedór sira,” Mateus hatete.

Partisipa iha serimónia kollieta ne’e, Vise Ministru Agrikultura no Peska (MAP), Marcos da Cruz, servisu na’in sira, líder lokál no komunidade sira iha área ne’ebá.