Primeiru-Ministru partisipa iha Semináriu Nasionál kona-ba Prevensaun no Kombate Brankeamentu Kapitál no Finansiamentu Terorizmu
Primeiru-Ministru Dr. Rui Maria de Araújo partisipa iha Semináriu Nasionál kona-ba prevensaun no kombate ba brankeamentu kapitál no finansiamentu terorizmu, iha kuarta-feira (29/04), iha salaun enkontru Ministériu Solidariedade Sosiál-Kaikoli, Díli.
Brankeamentu kapitál nu’udar prosesu ida ne’ebé autór krime ne’e subar orijen bens no rendimentu (vantajen) ne’ebe hetan liuhosi atividade ilegál, no transforma hahalok hirak ne’e ba kapitál ne’ebé mak bele uza ho legál, no la hatudu orijen ka na’in ba fundu hirak ne’e nian.
Xefe Governu salienta ba importánsia semináriu ne’e ba nasaun Timor-Leste ne’ebé nia instituisaun sira sei iha faze konstrusaun no konsolidasaun.
“Nasaun sira ne’ebé frájil maka sei sai alvu preferénsia ba realizasaun krime ne’e,” hateten Primeiru-Minsitru. “Semináriu ne’e bele hakle’an ita-nia koñesimentu kona-ba matéria ne’e no fahe ba malu kona-ba buat ne’ebé hala’o tiha ona no dezafiu sira ne’ebé ita hasoru.”
Dr. Rui Maria de Araújo rekoñese katak negósiu no investimentu ne’ebé lejítimu maka kontribui ba sustentabilidade seguransa sosiál ne’ebé bele hariku no lori prosperidade ba Estadu maibé governu hakribi lala’ok sira hanesan korrupsaun no brankeamentu kapitál.
“Timor-Leste hakarak teb-tebes atrai investidór sira no la’ós ‘brankeadores’,” tenik Dr. Rui Maria de Araújo.
Primeiru-Ministru afirma pozisaun VI Governu Konstitusionál nian kona-ba prevensaun no kombate brankeamentu kapitál katak tuir polítika toleránsia zero ba prátika krime sira ne’ebé bele estraga valór fundementál sira iha ita-nia sosiedade – ba demokrasia, solidariedade, justisa no seguransa interna.
Ho nune’e, sei kontinua no hadi’a di’ak liután esforsu sira ne’ebé hala’o ona husi VI Governu hodi bele halo protesaun ida di’ak ba nasaun no povu Timor-Leste.
Primeiru-Ministru husu atu Governu, instánsia judisiária sira, Prokuradoria-Jerál Repúblika, instituisaun finanseira sira, no entidade sira hotu ne’ebé relevante atu servisu iha liña kooperasaun di’ak hodi bele hetan susesu iha implementasaun sistema anti-brankeamentu ida ne’ebé efikáz hodi kombate finansiamentu terorizmu.
