Primeiru-Ministru inaugura Kaza Rekuperasaun Saúde
Iha loron 24, fulan-abril tinan 2015, Primeiru-Ministru, Dr. Rui Maria de Araújo, akompaña husi Ministru Estadu Koordenadór Asuntu Sosiál no Ministru Edukasaun, Fernando Lasama de Araújo, inaugura Kaza Rekuperasaun Saúde , iha Tibar, Munisípiu Likisá.
Primeiru-Ministru, Dr. Rui Maria de Araújo iha nia diskursu hatete katak, “ha’u sente onradu tebes hamriik iha ita boot sira nia oin hodi mai asiste realidade ne’ebé mak iha hodi hala’o inaugurasaun ba kaza rekoperasaun ba saúde ba moras HIV-SIDA nian, tanba ne’e, ha’u agradese tebes ba Sekretaria Estadu Polítika Formasaun Profesionál no Empregu ho Sentru Nasionál Empregu Formasaun Profesionál Tibar, bele prodúz formandu sira ne’e ho kualidade tebes hodi bele harii uma mahon ba rekuperasaun saúde ba moras HIV-SIDA nian."
Governu Konstitusionál VI, hahú nia servisu hodi hatete dehan katak ami hakarak servisu iha ekipa, ita hanesan timor-oan, sosiedade sivíl, Governu, emprezáriu ita hamutuk ho solidariedade fó apoiu ba ema sira ne’ebé hetan moras HIV-SIDA.
“Hahú ohin ba oin, kuandu sentru ne’e funsiona ita lokaliza mós esforsu atu fó suporta ba ema sira, ne’ebé afeta hosi moras ne’e, ho esforsu tomak atu kombate”, haktuir Rui Araújo.
Fatin ida ne’e tenke sai hanesan fatin lokál ba ita nia solidariedade, tanba ne’e, Governu kompromete atu uza fatin ida ne’e, hanesan fatin importante ida ba ita nia maluk timor-oan hotu-hotu ne’ebé afetadu sira.
“Papél atu previne moras HIV-SIDA, la’ós de’it iha Komisaun Nasionál Kombate SIDA, maibé papél ida ne’e iha ita hotu nia liman, maibé liu-liu iha área edukasaun nian, ita presiza hahú intensifika edukasaun ba ita nia oan sira kona-ba komportamentu ba risku HIV-SIDA”, tenik eis Ministru Saúde, iha Governu Konstitusionál dahuluk.
Ministru Estadu Koordenadór Asuntu Sosiál no Ministru Edukasaun, Fernando Lasama de Araújo, nu’udar mós Prezidente Komisaun Nasionál ba kombate HIV-SIDA haktuir katak, liu hosi inaugurasaun uma mahon ida ne’e, Estadu Timor sériu tebes hodi funu hasoru moras HIV-SIDA iha Timor-Leste, tanba ne’e karik ita lasériu atu kombate moras ida ne’e, ita bele konsidera hanesan invazaun boot ida ne’ebé invade hela iha ita nia rai.
Konstrusaun ba Kaza Rekoperasaun Saúde, HIV-SIDA, Tibar hetan ajuda orsamentu hosi Ministériu Solidariedade Sosiál ho montante osan dólar amerikanu rihun 150.
