Sorumutuk Estraordináriu Konsellu Ministrus loron 21 fulan-abríl 2015

Prezidénsia Konsellu Ministrus

VI Governu Konstitusionál

..............................................................................................................................

Díli, loron 21 fulan-abríl tinan 2015

Komunikadu Imprensa

Sorumutuk Estraordináriu Konsellu Ministrus loron 21 fulan-abríl 2015

Konsellu Ministrus hala’o sorumutuk estraordináriu tersa-feira ne’e, loron 21 fulan-abríl 2015, iha sala sorumutuk Konsellu Ministrus nian, iha Palásiu Governu, iha Díli, no aprova ona diploma haat no analiza ona aprezentasaun ida:

1. Dekretu-Lei ne’ebé aprova Sistema Nasionál Pagamentu nian sira

Diploma ida ne’e determina obrigasaun Banku Sentrál Timor-Leste nian (BCTL sigla iha lian portugés) atu estabelese, regula no fiskaliza Sistema Nasionál Pagamentu nian hothotu (SNP), hodi promove ninia efisiénsia no seguransa, no atu hamenus risku sira, liu-liu sira ne’ebé sistemátiku, no atu aumenta transparénsia no protesaun ba kliente sira. Iha diploma ne’e define funsaun no podér BCTL nian sira atu regula no fiskaliza sistema pagamentu nasionál, no estabelese mos rejime autorizasaun nian ida ba ema hirak ne’ebé kaer no hala’o servisu pagamentu nian. Diploma ne’e regula mós likidasaun, kompensasaun no karáter definitivu pagamentu nian sira no pagamentu eletróniku no moeda eletróniku.

2. Alterasaun daruak ba Lei Órgaun sira Administrasaun Eleitorál nian

Proposta Lei ida kona-ba tema ida ne’e Governu Konstitusionál V aprova tiha ona, iha sorumutuk Konsellu Ministrus iha loron 21 fulan-outubru 2014, no haruka ona ba Parlamentu Nasionál atu diskute no vota. Ho tomada pose Governu foun nian, no tanba diploma ida ne’e seidauk hetan votasaun hosi Parlamentu Nasionál, maka tuir Konstituisaun, Governu ida ne’e tenki aprova proposta foun ida.

Alterasaun ne’e, lei konsagra posibilidade atu atribui insentivu finanseiru ne’ebé bele kontribui ba prestasaun ida kualifikadu liu servisu púbkliku nian iha área eleitorál.

Iha elaborasaun diploma ida ne’e, tau mós iha konsiderasaun, komentáriu no sujestaun hirak ne’ebé hato’o liuhusi Parlamentu Nasionál no Prezidente Komisaun Nasionál Eleisaun nian.

3. Dekretu-Lei ne’ebé aprova Orgánika Ministériu Administrasaun Estatál 

Ministériu Administrasaun Estatál, tuir Orgáanika Governu Konstitusionál VI nian, nu’udar órgaun sentrál Governu nian ne’ebé responsabiliza ba konsesaun, ezekusaun, koordenasaun no avaliasaun ba polítika, ne’ebé Konsellu Ministrus define no aprova ona, ba área hirak kona-ba podér lokal, desentralizasaun administrativa, organizasaun no ezekusaun prosesu eleitorál no referendu nian sira, kona-ba promosaun ijiene no orgasnizasaun urbanu no kona-ba klasifikasasun no konservasaun dokumentu hirak ofisiál ho valór istóriku.

Governu Konstitusionál VI nian, Ministériu Administrasaun Estatál, la’os ona responsável ba jestaun programa públiku oin-oin kona-ba promosaun dezenvolvimentu lokál no rurál, ne’ebé maka muda fali ba Ministériu Planeamentu no Investimentu Estratéjiku.

Institutu Nasionál Administrasaun Públika maka sei sai hanesan organizmu autónomu Ministériu Administrasaun Estatál nian, iha ámbitu Administrasaun Indireta, hamutuk ho Sekretariadu Tékniku Administrasaun Eleitorál no Arkivu Nasionál.

4. Dekretu-Lei ne’ebé aprova Orgánika Ministériu Defeza nian

Ministériu Defeza, tuir Orgánika Governu Konstitusionál VI nu’udar órgaun sentrál Governu nian ne’ebé mak responsável ba konsesaun, ezekusaun, koordenasaun no avaliasaun polítika nian tuir define no aprova ona hosi Konsellu Ministrus, ba área kooperasaun nasionál no kooperasaun militár.

Husi kedas restaurasaun independénsia, Timor-Leste nafatin foti pasu desizivu sira ba-iha setór defeza nasionál nian. Iha Governu Konstitusionál  IV no V, ho razaun atu hakbiit seguransa nasionál, haree katak  presiza halo aproximasaun ida ba setór rua ne’e.

Ho hakotu Governu Konstitusionál V estrutura orgánika Ministériu Defeza no Seguransa nian halakon tiha ona, maibé presiza halo orgánika foun ida. Tanba ne’e, Governu Konstitusionál VI iha tinan 2015, setór defeza no seguransa nian hetan fali estrutura ministeriál independente ida, fila fali ba estrutura orijinál hodi haforsa servisu espesífiku sira setór ida-idak nian.

Estrutura ministeriál ne’e hatán ba ezijénsia hodi hakbiit defeza nasionál, liuliu iha aspetu militár, ne’ebé hatudu estrutura simples ida, maibé metin no firme nafatin, ho rekursu umanu sira ne’ebé mak iha kualifikasaun, ne’ebé hatudu ba nesesidade reál sira implementasaun estratéjia defeza nian, hodi la haluha atu halo koordenasaun interministeriál ne’ebé mak importante ho setór seguransa,  hodi orienta hosi prinsípiu sira subsidiariedade no komplementaridade entre F-FDTL, forsa no servisu seguransa nian sira.

 

Konsellu Ministrus mós análiza tiha ona:

1. Aprezentasaun “Diagnóstiku Nasionál nian”

 Ministru Estadu, Koordenadór Asuntu Administrasaun Estadu no Justisa no Ministru Administrasaun Estatál, hamutuk ho Gabinete Sekretáriu Estadu ba Fortalesimentu Institusionál, aprezenta ba Konsellu Ministrus “Diagnóstiku Nasionál”. Aprezentasaun ne’e ninia objetivu atu koñese problema sira iha Administrasaun Públika no ninia solusaun sira hodi hadi’a di’ak liután no hakbiit instituisaun.

 

   Ba leten