Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 17 fulan-abríl tinan 2015

Veteranu Timor-Leste nian sira vizita Austrália no sei partisipa iha serimónia loron ANZAC nian sira

Iha semana oin mai, veteranu sira ne’ebé halo parte iha Luta ba Independénsia Timor-Leste nian sei vizita Austrália atu dezenvolve relasaun ho komunidade veteranu sira nasaun ne’ebá nian, diskute kona-ba servisu veteranu sira nian no mós partisipa iha serimónia sira atu komemora ANZAC nia loron, ne’ebé iha tinan ida ne’e sei halo nia aniversáriu ba dala 100 dezembarke forsa ANZAC nian iha Gallipoli, durante Funu Mundiál Dahuluk.

Delegasaun lubuk ida sei ba hela iha sidade prinsipál sira iha Austrália, no delegasaun ne’ebé sei iha hela viajen nia laran sei la’o ba fatin barak iha nasaun ne’e atu partispa iha eventu prinsipál sira. Delegasaun ida ne’e, lidera husi Ministru Planeamentu no Investimentu Estratéjiku, Kay Rala Xanana Gusmão, inklui mós Ministra Solidariedade Sosiál, Isabel Amaral Guterres, Xefe Estadu-Maior Jenerál Forsa Defeza Timor-Leste nian, Major-Jenerál Lere Annan Timur, no mós Embaixadór Timor Leste nian iha Austrália, Abel Guterres. Tama mós iha delegasaun ne’e veteranu sira ne’ebé halo parte iha Luta Timor-Leste nian, inklui António Gomes da Costa (Mau Huno) no Gil da Costa Monteiro (Oan Soro) ne’ebé, hamutuk ho Ministru Xanana Gusmão no mós Major Jenerál Lere, hanesan veteranu na’in haat ne’ebé maka partisipa iha Luta ba Restaurasaun Independénsia Timor-Leste nian iha tinan 24 nia laran.

Vizita ba Austrália ne’e, veterana Inês de Almeida maka koordena, ne’ebé iha Austrália nu’udar portavóz Veteranu sira nian no iha inísiu tinan ida ne’e nian simu ona nomeasaun hanesan Reprezentante Veteranu sira nian hamutuk ho Primeiru-Ministru Timor-Leste nian, Dr. Rui Maria de Araújo.

Veteranu hotu-hotu ne’ebé maka partisipa iha vizita ne’e sei estuda aspetu sira ne’ebé iha relasaun ho “Asosiasaun ba Servisu hirak ne’ebé hala’o ona” husi Austrália (sigla iha lian inglés:RSL), atu nune’e bele ajuda dezenvolve “Konsellu Nasionál Kombatente Libertasaun Nasionál” Timor Leste nian no ho orgullu reprezenta komunidade veteranu sira Timor-Leste nian iha serimónia sira ANZAC nian oin-oin, liuliu iha serimónia hirak ne’ebé halo iha loron ANZAC nian, iha loron 25 fulan-abríl. Iha tinan lubuk ida nia laran mak RSL tulun ona Timor-Leste, hodi fó konsellu no asisténsia iha dezenvolvimentu organizasaun Veteranu sira Timor-Leste nian.

Durante vizita ne’e, feto faluk sira ne’ebé la’en mate iha funu laran husi delegasaun Timor-Leste nian sei nafatin hatutan relasaun ho Asosiasaun Feto Faluk tanba Funu Austrália nian.

Portavós Governu Timor-Leste nian, Ministru Estadu Agio Pereira, hateten katak “Rezolusaun Konsellu Estadu RSL Gales Foun Súl nian ne’ebé konvida veteranu Timor-Leste nian sira iha fulan-outubru tinan kotuk atu ‘partisipa ho maluk veteranu no aliadu sira iha Loron ANZAC nian iha fulan-marsu tinan 2015 no iha servisu komemorativu sira seluk iha Sydney’ hanesan jestu signifakativu ida. Ida ne’e  hanesan konvite ida ne’ebé hetan apresiasaun no mai duni husi relasaun ida ne’ebé forte liután ba beibeik entre Austrália ho komunidade veteranu sira Timor-Leste nian, ne’ebé hahú kedas iha Funu Mundiál Daruak no iha karatér amizade, hanoin di’ak ba malu no respeita malu. Governu hahii veteranu timoroan nian tanba sira haka’as an atu serbí di’ak liután sira nia maluk veteranu sira no tanba reprezenta Timor-Leste ho dignidade iha komemorasaun importante hirak ne’e iha Austrália.”