Konsellu Kombatente Libertasaun Nasionál sira nian sei estabelese formalmente

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 17 fulan-abríl tinan 2015

Konsellu Kombatente Libertasaun Nasionál sira

 nian sei estabelese formalmente

Dezenvolvimentu ”Konsellu Kombatente Libertasaun Nasionál sira nian” [CCLN-sigla iha lian portugés] fó hakat importante ida ba oin iha semana ida ne’e ho aprovasaun ne’ebé Konsellu Ministrus halo, iha loron tersa, ba Dekretu-Lei ida ne’ebé mak estabelese Konsellu ne’e ninia objetivu sira, estrutura no funsaun sira.

Konsulta sira kona-ba Konsellu ne’e halo ona ho veteranu sira hahú husi kedas tinan 2011. Dekretu-Lei ne’e fó ba CCLN funsaun hanesan órgaun konsultivu Governu nian, hodi rekoñese papél kombatente sira nian atu estabelese pás no estabilidade sosiál no mós papél ne’ebé maka sira sei kontinua soi iha dezenvolvimentu sustentável Timor-Leste nian.

Bainhira lei ne’e hetan ona promulgasaun, komisaun ida sei simu knaar atu estabelese Konsellu ne’e, iha períodu ida ho durasaun fulan neen.

Dekretu Lei ne’e mós estabelese loron 3 fulan-marsu hanesan Loron Nasionál Veteranu sira nian. Ida ne’e atuhodi rekoñese loron 3 fulan-marsu tinan 1981, hanesan loron iha ne’ebé hahú reorganizasaun Rezisténsia nian, ne’ebé reprezenta marka ida ba-iha Luta ne’e no akontese iha períodu ida ne’ebé mak difísil liu iha Luta ba Libertasaun Nasionál nian.

Portavós Governu nian, Ministru Estadu Agio Pereira hateten katak “aprovasaun ba Dekretu-Lei ne’e, fó dalan ba harii Konsellu Kombatente Libertasaun Nasionál sira nian nu’udar hakat ida ne’ebé importante atu fó onra, serbí no envolve kombatente sira ne’ebé mak luta ona atu liberta ita-nia nasaun”.

   Ba leten