Programa VI Governu Konstitusional aprezenta iha Parlamentu Nasional
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 24 fulan-marsu tinan 2015
Programa VI Governu Konstitusional aprezenta iha Parlamentu Nasional
Ohin dader, Programa VI Governu Konstitusional aprezenta ba Parlamentu Nasional hosi Primeiru-Ministru, Dr. Rui Maria de Araújo.
Primeiru-Ministru esplika durante aprezentasaun katak “Programa ne’ebe ami sei debate la os programa foun ida, maibe fo kontinuidade ba politika iha Planu Dezenvolvimentu Estratejiku 2011-2030 nia laran, ne’ehe hahu implementa ona hosi Programa V Governu nian.” Primeiru-Ministru haktuir mos katak “wainhira halo revizaun ba Program VI Governu nian, la os kona ba saida mak sei implementa, maibe liu-liu oinsa mak sei implementa. Prioridades ba nasaun determina tiha ona,” no hateten tan katak, “saida mak ami presiza desidi agora mak oinsa atu implementa prioridade hirak ne’e tuir maneira efisiente no efetivu.”
Efisiensia mak fundamental ba iha komposizaun VI Governu Konstitusional foun ho ezekutivu reduzidu hosi membrus nain 55 ba 38, estrutura ida ne’ebe salienta kordenasaun diak liu tan entre Ministeriu sira, no konsentra liu ba rezultadu.
Primeiru-Ministru hateten tan katak hadiak prestasaun servisus nudar xavi atu implementa areas prioridade hat identifika tiha ona ba Governu: hadiak kualidade obras publikas, halo reformas ba administrasaun publika, armoniza no kria padraun ba leis, no halao reforma fiskál. Primeiru-Ministru esplika tan kona ba pontus xave Programa nian kona ba pilar hat ba dezenvolvimentu nasional: Setór Sosial, Setór Infrastrutura, Setór Ekonomia no Setór Boa Governasaun.
Portavós Governu nian, Agio Pereira, nota katak “Tranzisaun hosi V ba VI Governu Konstitusional hetan mandato atu aprezenta Programa Governu foun liu hosi Seksaun 108 Konstituisaun Timor-Leste nian. Ida ne’e autoriza revizaun Programa uluk nian no halo ajustamentu kona ba atividades atu bele maximiza rezultadu tanjivel iha tinan rua ho balun atu mai nia laran. Programa nia susessu sei hatudu liu hosi kompleta infrastrutura tuir tempu no ho kualidade, liu hosi prestasaun diak kona ba servisus no hadiak ne’ebe bele sukat kona ba dezempeñu setor publiku nian. Efeitu pozitivu hosi rezultadu sei iha impaktu ba armonia nasional no estabilidade, ne’ebe presiza atu hadiak liu tan atu hetan dezenvolvimentu sustentavel ba longu prazu.”
Programa ne’e sei debate iha Parlamentu Nasional no sei hein katak dokumentu sei finaliza no aseita molok Parlamentu hahu konsidera debate kona-ba Orsamentu Retifikativu ne’ebe tuir orariu sei hahu iha loron 1 Abril.
