Sorumutu estraordináriu Konsellu Ministrus loron 27 fevereiru 2015
Prezidénsia Konsellu Ministrus
VI Governu Konstitusionál
..............................................................................................................................
Díli, Loron 27 Fulan-fevereiru Tinan 2015
Komunikadu Imprensa
Sorumutu estraordináriu Konsellu Ministrus loron 27 fevereiru 2015
Kosellu Ministrus hala’o sorumutu estraordináriu iha sesta-feira ne’e, loron 27 fevereiru 2015, iha sala sorumutu Konsellu Ministrus nian, iha Palásiu Governu, iha Díli, no analiza ho ezaustiva ezbosu kona-ba Programa VI Governu Konstitusionál, ne’ebé elabora ona hafoin simu, iha semana ikus ne’e, proposta sira hosi membru foun Ezekutivu nian no Programa V Governu Konstitusionál nian. Ba ezbosu ida ne’e hatama tan alterasaun ruma ne’ebé hato’o hosi titulár hosi pasta ida-ida atu hadiak liu tan, kompleta tan no atu asegura hodi dokumentu ne’ebé hatudu-dalan ba asaun Ezekutivu nian to’o tinan 2017 ne’e, bele implementa iha tinan rua no balun nia laran.
Membru Konsellu Ministrus sira sei analiza, iha loron rua tuir mai, dokumentu ne’ebé hetan hosi sorumutu ida ne’e atu, hafoin aprova ona iha sorumutu tuir mai, bele lori ona ba Parlamentu Nasionál.
Atu dehan deit katak VI Governu Konstitusionál ne’e iha ninia filozofia ne’ebé hateten katak atu fo deit kontinuidade ba servisu hirak hala’o tiha ona hosi governu ida uluk, no fo onra ba legadu ida ne’e, maibé labele haluha, halo adaptasaun ba alterasaun ruma ne’ebé mosu hosi dezenvolvimentu hirak ne’ebé país ne’e hasoru.
